Մկրտչյանի տեղեկացմամբ՝ Հայաստանում 2010թ-ից ոստիկանության հետ համատեղ ավելի կոշտ պայքար է սկսվել ոչ լիցենզիոն ծրագրերի վաճառքի եւ տարածման առումով։ Որոշ գործեր ընթացքի մեջ են, որոշ գործեր կարճվել են, քանի որ օրինախախտներն ընդունել են իրենց մեղքը եւ ծրագրերի իրավատիրոջը՝ այս դեպքում «Մայքրոսոֆթ»-ին վճարել համապատասխան փոխհատուցում։

«Հարուցված 3 քրեական գործերով, փորձագետների եզրակացության հիման վրա, վնասի չափը կազմում է մոտ 110 հազար դոլարին համարժեք դրամ»,- ասաց Ն. Մկրտչյանը: Նրա խոսքով՝ 3 տարվա ընթացքում Հայաստանում ոչ օրինական ծրագրերի կիրառման հետեւանքով «Մայքրոսոֆթ» ընկերությանը վճարվել է մոտ 10 հազար դոլար կամ 3 մլն դրամից ավելի: Փորձագետի խոսքով՝ համապատասխան գործողություները վստահություն են ներշնչում օտարերկրյա կազմակերպություններին` Հայաստանում ներդրումներ կատարելու համար:

Հայաստանի կառավարությունը Microsoft կորպորացիայի հետ համագործակցության պայմանագիր կնքել է դեռեւս 2007թ., որի համաձայն՝ Microsoft-ը Հայաստանում մի շարք ներդրումային, կրթական եւ նորարարական ծրագրեր պետք է իրականացներ։ Microsoft-ի հայաստանյան գրասենյակի ղեկավար Գրիգոր Բարսեղյանը որ ընկերությունը կատարել է իր ստանձնած պարտավորությունները, սակայն կառավարության պարտավորությունների կատարումը կարծես դանդաղում է։

«Կառավարության ստանձնած պարտավորությունների կատարման գործում նույնպես դրական միտումներ կան, հատկապես՝ հեղինակային իրավունքի դաշտի բարելավման ուղղությամբ, սակայն դա կառավարության ստանձնած ընդամենը մի պարտավորությունն է»,-ասաց Գ. Բարսեղյանը՝ նշելով, որ ըստ համաձայնագրի՝ Հայաստանում պետական գնումներով ձեռք բերվող նոր համակարգիչները պետք է լիցենզիոն ծրագրային ապահովում ունենային։ Կառավարությունը պետք է ստանձներ նաեւ բանակցությունների սկսումը, որպեսզի պետական ապարատում օգտագործեին միայն լիցենզիոն ծրագրեր։ Այս մասով, սակայն, շարժ կարծես թե չի նկատվում։

Գ. Բարսեղյանի խոսքով՝ ոչ միայն Microsoft-ը, այլեւ ցանկացած այլ միջազգային հեղինակավոր ընկերություն ավելի շատ կհարգի այն երկրներին եւ կառավարություններին, ովքեր օրինակ են ծառայում երկրում օրինականության հաստատմանը՝ օգտագործելով օրինական ծրագրային ապահովվում։

«Պետական կառույցների կողմից օրինական ծրագրերի կիրառումը կարող է լավագույն օրինակը հանդիսանալ այլ ընկերությունների համար, եւ այդպիսով նպաստել երկրում պիրատության մակարդակի նվազմանը»,-ասաց Գ. Բարսեղյանը։

Տեղեկացնենք, որ Ադրբեջանի կառավարությունը վերջերս Microsoft կորպորացիայի հետ համագործակցության պաշտոնական համաձայնագիր կնքեց։ Ըստ այդմ, բոլոր պետական կառույցները, որոնց վրա տարածվում է համաձայնագիրը, պետք է օգտագործեն միայն օրինական լիցենզիա ունեցող ծրագրային ապահովում։ Կնքված համաձայնագիրը նպատակ ունի նվազեցնել Ադրբեջանում պիրատական ծրագրերի օգտագործման մակարդակը։ Նշենք, որ BSA ուսումնասիրությունների համաձայն՝ 2011թ մայիսի դրությամբ Ադրբեջանում պիրատությունը գնահատվում է 88 տոկոս։