Սմարթֆոններում եւ այլ շարժական սարքերում արդեն հնարավոր է կարդալ հայերեն վեբ կայքեր, Էլեկտրոնային գրքեր եւ այլն: Այսօր՝ մայիսի 4-ին տեղի ունեցավ hy-AM.org նախագծի «Հայերեն լեզվի սատարումը բջջային օպերացիոն համակարգերում» ծրագրի շնորհանդեսը:
Մինչ այժմ հայերեն տեքստի փոխարեն բջջային հեռախոսների մեծ մասում վանդակներ էին երեւում: Այժմ հայերենը հնարավոր է դառնում կարդալ Անդրոիդ, Մաեմո, ՄիԳո, Սիմբիան եւ Վինդոուզ Մոբայլ համակարգերով աշխատող սարքերում: Բոլոր համակարգերում, բացառությամբ Սիմբիանի, հնարավոր է դառնում նաեւ հայերեն լեզվով մուտքագրումը: Այս մասին ծրագրի շնորհանդեսի ժամանակ ասաց «Հայերեն լեզվի սատարումը բջջային օպերացիոն համակարգերում» ծրագրի համակարգող Ալեքսեյ Չալաբյանը: Նրա խոսքով` տառատեսակները հեշտությամբ կարելի է տեղադրել հեռախոսների մեջ հատուկ ստեղծված ծրագրերի` տեղակայիչ փաթեթների օգնությամբ:
«Գործընթացն այնքան պարզ է, որ հեռախոսների հայաֆիկացումը կարող է կատարել ցանկացած շարքային օգտագործող»,-ասաց Ա. Չալաբյանը` հավելելով, որ հայերեն տառատեսակները տեղակայող ծրագրային փաթեթները արդեն հասանելի են անվճար ներբեռնման եւ տեղադրման համար http://hy-am.org կայքում:
Ա. Չալաբյանի խոսքով` իրենք նպատակ ունեն այս ծրագրի շրջանակներում ստեղծած տառատեսակները փոխանցել Google-ին` դրանք պաշտոնապես Անդրոիդ համակարգում ներառելու համար:
Նշենք, որ բջջային հեռախոսների համար ավելի քան 30 տառատեսակ է ստեղծել Ռուբեն Թառումյանը:
Ծրագրին աջակցություն է ցուցաբերել «Բաց հասարակության հիմնադրամը»` տրամադրելով մոտ 7 հազար դոլար:
|