Հայաստանում մեկնարկում է Տեղեկատվական տեխնոլոգիաների ոլորտի մենեջերների ամենամյա մրցանակաբաշխությունը: Հաղթողները հնարավորություն կստանան 15-օրյա վերապատրաստման կուրսեր անցնել Սթենֆորդի համալսարանում (Stanford Executive Institute):
Հիշեցնենք, որ նախորդ տարի մեկնարկած մրցույթն այդպես էլ կիսատ մնաց` «Լույս» հիմնադրամը չկարողացավ միջոցներ գտնել ծրագիրը ֆինանսավորելու համար: Այս տարի ֆինանսավորման պարտավորությունն իր վրա է վերցրել ՎիվաՍել-ՄՏՍ ըներությունը` տրամադրելով 19 մլն դրամ; Հաղթող պետք է ճանաչվեն 3 մենեջերներ` այնպիսի ընկերություններից, որտեղ աշխատողների թվաքանակը չի գերազանցում 50-ը:
Փաստորեն` յուրաքանչյուր տեղի համար ՎիվաՍել-ՄՏՍ-ի կողմից հատկացվում է 20 հազ. դոլար: Սակայն «Սինոփսիս-Արմենիա»-ի տնօրեն Հ. Մուսայելյանի տեղեկացմամբ` Սթենֆորդի համալսարանը որոշ զեղչ է արել հայ ուսանողների համար, եւ պարտավորվել ամեն տարի առնվազն 3 հոգի ընդունել վերապատրաստման; «Տնօրեն չի նշանակում մարդ, որը կնիք ունի եւ հրամաններ է տալիս»,- ասաց Հ. Մուսայելյանը:
Ծրագրի կարեւորությունն ընդգծում են նաեւ կառավարությունում; Մրցանակաբաշխությունն իրականացվում է ՀՀ վարչապետի հովանու ներքո, իսկ վարչապետի օգնական Վարդան Նիկոյանի խոսքով` ՏՏ ոլորտում ունենք լուրջ ռեսուրսներ, որոնք անարդյունավետ ու սխալ են կառավարվում:
Սթենֆորդի համալսարանում վերապատրաստման ծրագիրը, ըստ վարչապետի օգնականի, այն քայլերից է, որը թույլ կտա բարձրացնել ոլորտի կառավարման որակը:
Նշենք, որ Սթենֆորդի համալսարանը մենեջերների վերապատրաստման ոլորտում աշխարհում ամենահեղինակավոր կրթօջախներից է, որտեղ ուսուցանում են խոշոր եւ հայտնի ընկերությունների մենեջերներ:
|