Մարտի 1-ից ուժի մեջ մտած «Հսկիչ նշանների (դրոշմապիտակների) միջոցով տեսաձայնային մագնիսական կրիչների պարտադիր դրոշմավորման մասին» ՀՀ օրենքի կիրառությունն առայժմ կասեցվել է։ Օրենքը առաջացրել է տեսաձայնասկավառակների շուկայում գործող մի խումբ ընկերությունների դժգոհությունը, որոնց մասին էլ մարտի 31-ին հրավիրված մամլո ասուլիսի ժամանակ իրենց կարծիքները հայտնեցին՝ «Ադմանս փրոդաքշն» ընկերության տնօրեն Շավարշ Ղարիբյանը եւ «Հայ ֆայ» ստուդիայի տնօրեն Արտաշես Բոստանջյանը։
«Մենք Հայաստանում գործող 15-20 տարվա ստուդիաներ ենք, ովքեր օրինական վճարում են պետությանը բոլոր հարկերը, սակայն ստացվում է, որ այս նոր օրենքի համաձայն մենք համարվում ենք պիրատ»,-ասաց Ա. Բոստանջյանը՝ նշելով, որ նոր օրենքի համաձայն իրենք պարզապես իրավունք չունեն վաճառել որեւէ հայ կամ արտասահմանյան հեղինակի ստեղծագործություն՝ ֆիլմ, երաժշտություն, եթե ձեռք չեն բերել տվյալ ստեղծագործության իրավատիրոջ թույլտվությունը։
Ա. Բոստանջյանի խոսքով, սակայն Հայաստանում անհնար է ձեռք բերել որեւէ արտասահմանյան հեղինակի ստեղծագործության տարածման թույլտվություն, քանի որ Հայաստանում հեղինակային իրավունքի հարցերով զբաղվող միակ ընկերությունը՝ «Հայհեղինակը» արտասահմանյան որեւէ ստեղծագործողի հեղինակային իրավունքի հարցերով չի զբաղվում:
«Ստացվում է, որ այդ հարցերով պետք է զբաղվենք մենք, իսկ դա ոչ միայն ծախսատար է, այլեւ բավականին ժամանակատար, իսկ ըստ օրենքի այդ ամենի համար մենք ունենք ընդամենը 90 օր, իսկ ժամկետը լրանալու պարագայում այդ բոլոր գործողությունները պետք է սկսել նորից»,-ասաց Ա. Բոստանջյանը։
Շավարշ Ղարիբյանի խոսքով՝ իրենք ցանկանում են, որպեսզի օրենքի քննարկումներին անպայման ներգրավվեն ոլորտում գործող կազմակերպությունների ներկայացուցիչները, որպեսզի օրենքի փոփոխությունները ճիշտ կատարվեն։
«Օրինակ՝ արտասահմանյան ընկերությունների հետ պայմանագրեր հնարավոր չէ ձեռք բերել, իսկ մեր բնագավառի շատ կազմակերպություններ այս բիզնեսի համար վարկեր են վերցրել եւ ձեռք են բերել մեծ քանակի ապրանքներ մինչեւ օրենքի ուժի մեջ մտնելը: Եթե այսօր այս օրենքը կիրառվի, ստացվում է, որ այդ ամենը հավասարվում է զրոյի»,-ասաց Շ. Ղարիբյանը՝ նշելով, որ իրենք ցանկանում են, որպեսզի պետությունը տրամադրի դրոշմապիտակներ` նախկինում թողարկված ստեղծագործությունների համար, բնականաբար, վճարով։
«Մենք պատրաստ ենք գնել այդ դրոշմապիտակները։ Պետք է այնպիսի լուծում գտնել, որպեսզի տնտեսվարող սուբյեկտները խուսափեն մեծ կորուստներից»,-ասաց Շ. Ղարիբյանը։
|