«Հսկիչ նշանների (դրոշմապիտակների) միջոցով տեսաձայնային մագնիսական կրիչների պարտադիր դրոշմավորման մասին» օրենքի ընդունումից հետո դժգոհություններ են առաջացել տեսաձայնագրման ստուդիաների, CD-ների, DVD-ների, Ble-ray Disc-ների (BD) վաճառքով զբաղվող մանր ու միջին գործարարների շրջանում։ Կառավարությունը համապատասխան օրենքի ընդունումից հետո որոշում է ընդունել, ըստ որի, 2011 թ. թվագրված տեսաձայնային մագնիսական կրիչները պետք է պարտադիր դրոշմավորվեն։
Առաջին հայացքից օրենքն ու որոշումը դրական են, քանի որ, օրինակ՝ շուկայում վաճառվող ոչ արտոնագրված երաժշտական ու ծրագրային պարունակությամբ կրիչների չաշխատելու կամ վատ աշխատելու, կամ դրանց պարունակության թերիության դեպքում սպառողի համար լավ հնարավորություններ են ստեղծվում՝ պաշտպանելու իր իրավունքները։ Բայց խնդիրն այն է, որ ընդունված օրենքը շուկայում վաճառվող ապրանքի կրիչների հետ որեւէ կերպ առնչություն չունի, քանի որ վաղուց արդեն շուկայում վաճառվող կրիչները ոչ թե մագնիսական են, այլ օպտիկական, որի պարունակությունը վերծանում է լազերային ճառագայթը, այլ ոչ թե մագնիսական գլխիկը։
Օրենքում օգտագործված եզրույթները ավելի մատչելի դարձնելու նպատակով նշենք, որ տեսաձայնային մագնիսական կրիչը՝ նախորդ դարում հայտնի մագնիսական ժապավենով «կասետներն» էին, որոնք այսօր օգտագործումից դուրս են եկել։ Այսինքն՝ ստացվում է, որ օրենքն ընդունել են նախորդ դարի տեխնիկական սարքի մասին, եւ ստիպում են, որ վաճառողները, որոնք արդեն մի քանի տարի է չեն վաճառում օրենքով պահանջվող տեսաձայնային մագնիսական կրիչներ, այդ դրոշմապիտակները ձեռք բերեն, ու ամրացնեն անհասկանալի է որտեղ, որովհետեւ «վիդեո ու աուդիո կասետներ» չունեն իրենց վաճառակետերում։ Աբսուրդ է, բայց սա է օրենքի պահանջը։
Ամեն դեպքում զարմանալի է, թե ինչո՞ւ են ընդունված օրենքից ու որոշումից գործարարները դժգոհում, միեւնույն է այս օրենքի պահանջը որեւէ կերպ չի առնչվում իրենց գործունեությանը:
|
