Սակայն նշենք, որ ներմուծված հեռախոսնների մաքսային արժեքը համարյա կրկնակի նվազել է։ 2009 թ. 1 հեռախոսը ներմուծվում էր 160 դոլարով, իսկ 2010-ին՝ 80 դոլարով։ Դա կարող է պայմանավորված լինել 2 հանգամանքով; Առաջին՝ բջջային հեռախոսների գինը նվազում է ամբողջ աշխարհում, երկրորդ՝ աճել է պահանջարկը էժանագին հեռախոսների նկատմամբ:

Nokia խանութ-սրահի վաճառող Ալեքսեյ Հովհաննիսյանի խոսքով՝ նախորդ տարվա համեմատ այս տարի վաճառքները շատ չեն ավելացել, սակայն մեկ տարվա ընթացքում գները նվազել են միջինը 20 հազար դրամով։ Չեղչվել են հատկապես մեծ պահանջարկ վայելող մոդելների գները։ Նրա խոսքով՝ ավելի շատ վաճառվում են առավել էժան մոդելները՝ 5/1-ի հարաբերությամբ։  

Samsung խանութ-սրահի վաճառող- խորհրդատու Լիլիթ Գրիգորյանը եւս այն կարծիքին է, որ ընդհանուր առմամբ հեռախոսների վաճառքի աճ չկա, իսկ գները էժանացել են։ «Հեռախոսների գները 30%-ով նվազել են նախորդ տարվա համեմատ»,-ասաց Լ. Գրիգորյանը։ Նրա խոսքով՝ առավել շատ վաճառվում են ձեռքի հպումով (touch screen) հեռախոսները։

Sony Ericsson -ի խանութ-սրահի մենեջեր Արթուր Բադալյանի խոսքով՝ընդհանուր առմամբ վաճառքները նույնն են մնացել։ Ինչ վերաբերում է գներին, ապա նույն ֆունկցիաներով հեռախոսներն ավելի էժան են, քան նախորդ տարի։

«Վաճառվում են հիմնականում ավելի էժան կամ միջին գնի մոդելները»,-ասաց Ա. Բադալյանը։

Askat mobile խանութ-սրահի վաճառող- խորհրդատու Լիլիթ Ավանեսյանի խոսքով՝ նախորդ տարվա համեմատ այս տարի վաճառքները նվազել են, սակայն նախորդ տարվա համեմատ այս տարի ավելացել է iphone- ների նկատմամբ հետաքրքրությունն ու պահանջարկը։ «Վաճառվում են հիմնականում Nokia եւ Samsung ֆիրմայի հեռախոսներ, իսկ անցած տարվա համեմատ ավելացել է iPhone- ների վաճառքը»,- ասաց Լ. Ավանեսյանը։

iPhone.am խանութ-սրահի վաճառքի մենեջեր Արամ Թադեւոսյանի խոսքով՝ բջջայինների վաճառքի ավելացում առանձնապես չկա։ Սակայն սմարթֆոնների շրջանում ավելացել է հենց iPhone-ների վաճառքը։