Հայաստանի հանրային ծառայությունները կարգավորող հանձնաժողովի որոշման համաձայն՝ 3 ընկերություն՝ «Արմինկոն», Ucom-ը եւ Crossnet-ը, թույլտվություն են ստացել Հայաստանում նոր տիպի՝ առանց աշխարհագրական դիրքի ֆիքսված հեռախոսակապի ծառայություններ առաջարկելու։ Ընկերությունները ծառայությունը պետք է տրամադրեն 060 կոդով։
Crossnet ընկերության տնօրեն Վարդան Ալեքսանյանը ավելի վաղ զրույցում ասել էր, նոր տիպի՝ առանց աշխարհագրական դիրքի ֆիքսված հեռախոսակապը հնարավորություն կտա ցանկացած վայրում եւ ցանկացած քանակի հեռախոսահամարներ ունենալ ինտերնետի միջոցով եւ անհրաժեշտ չի լինի հեռախոսալար անցկացնել՝ կապ տրամադրելու համար: Այն հատկապես հարմար է խոշոր ընկերությունների համար։
Նախորդ տարվա սեպտեմբերից՝ ընկերությունը նմանատիպ ծառայություն է տրամադրում: 060 կոդին հաջորդող վերցանիշ հեռախոսահամարների առաջին երկու նիշը 37 է։ Ինչպես հայտնեցին Crossnet ընկերությունից, ներկայումս ընկերության տրամադրած ֆիքսված հեռախոսակապից օգտվում է մոտ 2000 բաժանորդ, որոնք հիմնականում խոշոր եւ միջին ընկերություններ են, իսկ դրանց մեջ ֆիզիկական անձանց թիվն ավելի քիչ է։
«Արմիկո» ընկերությունը ֆիքսված հեռախոսակապի ծառայություն կսկսի տրամադրել ապրիլից՝ 060 կոդին հաջորդող վեցանիշ հեռախոսահամարների առաջին երկու նիշը կլինի 27։ Ընկերության տնօրեն Անդրանիկ Ալեքսանյանը զրույցում ասաց, որ ծառայությունը ներկայումս գտնվում է փորձարկման փուլում, մնացել է ընդամենը ծառայության գինը որոշել եւ տրամադրել այն։ Ա. Ալեքսանյանի խոսքով՝ գինը կլինի մրցակցային։
Ucom ընկերությունը եւս ապրիլի 1-ից կսկսի տրամադրել ֆիքսված հեռախոսակապի ծառայություն։ Ընկերության տրամադրած ֆիքսված հեռախոսակապի 060 կոդին հաջորդող վեցանիշ հեռախոսահամարը կսկսվի 44-ով։ Ընկերության տեղեկատվական բաժից հայտնեցին, որ ֆիքսված հեռախոսակապի ներցանցային զանգերի սակագինը կլինի 1դրամ/րոպեն, դեպի Հայաստանի ֆիքսված հեռախոսակապի այլ օպերատորներ զանգերի արժեքը 5 դրամ/րոպեն։
«ԱրմենՏել» ընկերության մամուլի ծառայության ղեկավար Անուշ Բեղլոյանը՝ ասաց, որ «ԱրմենՏել» ընկերությունը ողջունում է ֆիքսված հեռախոսակապի ոլորտում նոր ընկերությունների մուտքը շուկա եւ պատրաստ է մրցակցության։
«Ֆիքսված հեռախոսակապի ոլորտում գների փոփոխությունը կապված կլինի նաեւ նոր ընկերությունների մուտքից եւ նրանց գնային առաջարկներից»,-ասաց Ա. Բեղլոյանը։
|