Առաջին անգամ Երեւանում այսօր` մարտի 23-ին ժամը 19։00-ին «Բյուրոկրատ» գրախանութում կկազմակերպվի «PowerPoint + Karaoke» ոչ ավանդական միջոցառման առաջին demo տարբերակը, որը միավորում է զվարճանքը, ուսումը, մրցակցությունը եւ մարդկանց։ Կազմակերպիչը «Նախագծերի կառավարման հայկական ասոցացիան» է (APMA):
«Կազմակերպիչները նախօրոք պատրաստում են PowerPoint մի քանի շնորհանդես, սակայն դրանց բովանդակությունը մասնակիցներ համար գաղտնի է մնում: Փաստորեն, ստացվում է այնպես, որ մասնակիցները տեղյակ չեն, թե հաջորդ էջում ինչ են ներկայացնելու: Նրանք պետք է արագ կողմնորոշվեն ու շփում հաստատեսն լսարանի հետ: Այս մասին ասաց միջոցառման կազմակերպիչներից Հայկ Ասրիյանցը: Նրա խոսքով` միջոցառումն առաջին անգամ կանցկացվի ընկերական շրջապատում, իսկ դրան կմասնակցեն հիմնականում տեղեկատվական տեխնոլոգիաների ոլորտի մասնագետներ:
Հ. Ասրիյանցի խոսքով` ներկայացվող շնորհանդեսների թեմաները տարբեր են լինելու, իսկ յուրաքանչյուր մասնակցի տրվելու է 6-7 րոպե։
Միջոցառման վերջում քվեարկությամբ որոշելու են լավագույնին եւ նվիրելու են զվարճալի մրցանակ։
« Մենք նպատակ ունենք այս միջոցառումը կազմակերպել պարբերաբար, իսկ «PowerPoint + Karaoke» բաց է յուրաքանչյուր ցանկացողի համար»,- ասաց Հ. Ասրիյանցը:
Նշենք, որ «PowerPoint + Karaoke» միջոցառումն առաջին անգամ անցկացվել է Բեռլինում 2006 թ.։ Այն նպատակ ունի ավանդական Power Point ներկայացումները դարձնել զվարճանքի միջոց: Այս միջոցառումը նախատեսված է գրասենյակային աշխատողների համար, ովքեր հոգնել են կորպորատիվ միջոցառումներից եւ մի քիչ հանգստանալու եւ զվարճանալու կարիք ունեն։
|