Ինֆորմացիոն Տեխնոլոգիաների Ձեռնարկությունների Միությունը (UITE) ձեռնարկում է նոր նախագիծ` «Տեղեկատվական Տեխնոլոգիաները բիզնեսի համար» թեմատիկ հանդիպումների շարք, որի նպատակն է տնտեսության տարբեր ոլորտների գործարարներին ներկայացնել կիրառելի տեխնոլոգիական լուծումները, ինչպես նաեւ նրանց մշտապես իրազեկել տեխնոլոգիական նորություններին: Այս մասին տեղեկացնում են Ինֆորմացիոն տեխնոլոգիաների ձեռնարկությունների միությունից:
Նրանց տրամադրած տեղեկատվության համաձայն` միջոցառման շրջանակում յուրաքանչյուր ամիս շահագրգիռ բիզնես ձեռնարկությունների համար կանցկացվի թեմատիկ հանդիպում ՏՀՏ ընկերությունների հետ, որի ընթացքում գործարարները հնարավորություն կունենան ծանոթանալու իրենց հետաքրքրող տեխնոլոգիական բոլոր լուծումներին մեկ վայրում, ինչպես նաեւ համատեղ քննարկել փոփոխվող շուկայի պայմաններում պահանջները նոր տեխնոլոգիաների նկատմամբ:
Հանդիպումների շարքի շրջանակում կընդգրկվեն հետեւյալ ոլորտները` բանկեր, շինարարություն, բժշկություն եւ ֆարմացեւտիկա, հանքարդյունաբերություն, ոսկերչություն, առևտուր, ապահովագրություն, սննդային արդյունաբերություն, տրանսպորտ, տուրիզմ, գյուղատնտեսություն, կրթություն եւ այլն:
Միջոցառման անդրանիկ հանդիպումը տեղի կունենա մարտի 25-ին եւ 31-ին եւ նվիրված կլինի տեխնոլոգիաների կիրառմանը բանկային ոլորտում: Անդրանիկ հանդիպման ընթացքում բանկային ոլորտին ուղղված տեխնոլոգիական լուծումներ կներկայացնեն iCON Communications, GNC-Alfa, Norq, CQG IMA, Shirak Technologies/SAP, Apaga Technologies, FlexAp, McAfee, EpygiArm, ArmSoft, Lime Tech, CHS Vericell, Damaris, Smart Tech, Alfa/Polycom ընկերությունները: Միջոցառումը կիրականացվի Հայաստանի Բանկերի Միության և ՀՀ Կենտրոնական Բանկի աջակցությամբ:
|