Անդրոիդ օպերացիոն համակարգով արդեն կարելի է հայերեն կարդալ՝ նոր ստեղծված Hay (նախկին՝ LIFE WebBrowser) կոչվող բրաուզերի միջոցով։
Նոր բրաուզերը հնարավորություն է տալիս ոչ միայն կարդալ հայերեն, այլեւ գրել, քանի որ այն առաջարկում է նաեւ հայերեն տառատեսակների ամբողջական փաթեթ։ Այս մասին ասաց նորաստեղծ բրաուզերի հեղինակ, ծրագրավորող Հայկ Ծիրունյանը։ Նրա խոսքով՝ նոր բրաուզերը ունենալու պարագայում այլեւս կարիք չի լինի կատարել սովորական օգտագործողների համար բավականին բարդ «ռութինգի» գործընթացը։
Բրաուզերը կարելի է բեռնել պարզապես սոցիալական ցանցի էջից՝
http://www.facebook.com/home.php?sk=group_191625270874191&ap=1, ու դրանով
գրել կամ կարդալ հայերեն լեզվով։
«Անդրոիդը գրված է բաց կոդով, ես պարզապես գտել եմ լուծում՝ թե ինչպես կարելի է այդ օպերացիոն համակարգում գրել եւ կարդալ հայերեն»,-ասաց Հ. Ծիրունյանը՝ նշելով, որ հայերեն տեսնել եւ գրել կարելի է միայն այս բրաուզերով աշխատելու պարագայում, իսկ մնացած դեպքերում ստեղնաշարը նորից կգրի հայերեն, սակայն Անդրոիդն այն ցույց կտա որպես վանդակավոր տեքստ։
Ա. Ծիրունյանի խոսքով՝ շուտով բրաուզերում կավելանան նաեւ բազմաթիվ հատկություններ եւ վիրտուալ ստեղնաշարի տառատեսակներ, որպեսզի այն հարմար լինի շատերին:
Հիշեցնենք, որ աշխարհում հատկապես բջջային հեռախոսների շրջանում մեծ տարածում գտած օպերացիոն համակարգի՝ Անդրոիդի, հայերեն տառերը չճանաչելու առնչությամբ հայերը մի քանի անգամ պաշտոնապես դիմել էին Google-ին, որպեսզի Անդրոիդն արտադրվելիս իր մեջ արդեն ներառի պատրաստված հայերենով հագեցած տառատեսակներ, ինչը հնարավորություն կտա խուսափել տեխնիկական բոլոր խնդիրներից եւ տուփից նոր հեռախոսը հանելով, անմիջապես հնարավոր լինի օգտվել հայերեն մենյուից: Փաստորեն նոր ստեղծված բրաուզերը այս առնչությամբ կարող է բավականին լավ այլընտրանք հանդիսանալ։
|