Գլխավոր » 2011 » Փետրվար » 2 » Թուրքերի կոտրված 6000-ից ավել կայքերը չեն վերաբերում ցեղասպանությանը
19:20
Թուրքերի կոտրված 6000-ից ավել կայքերը չեն վերաբերում ցեղասպանությանը
Թուրք հաքերների կողմից կոտրված կայքերը Հայոց ցեղասպանության հետ կապ չունեն։ Այս մասին ասաց տեղեկատվական անվտանգության մասնագետ Սամվել Մարտիրոսյանը՝ պարզաբանելով թուրքական լրատվամիջոցների այն լուրերը, թե թուրք հաքերները կոտրել են հայոց ցեղասպանության մասին գրառումներ ունեցող 6713 կայքեր։
Նշենք, որ «1923 թուրքական խումբ» թուրք հաքերները փետրվարի 1-ին կոտրել է արտասահմանյան 6000-ից ավելի կայք եւ գլխավոր էջում տեղադրել «Հայկական ստերին մի հավատա, ամենամեծ ցեղասպանությունը դու ես արել, Ամերիկա՜» տեքստը։
Ըստ Ս. Մարտիրոսյանի՝ իրականում թուրք հակերների այս գործողությունը օգնել է ցեղասպանության մասին ճշմարտության տարածմանը։
«Գուցե զավեշտալի հնչի, սակայն նրանց կարելի է անգամ շնորհակալություն հայտնել Հայոց ցեղասպանության վերաբերյալ ճշմարտությունը տարածելու համար»,-ասաց Ս. Մարտիրոսյանը՝ նշելով, որ կոտրված կայքերի շրջանում կատարած իր ուսումնասիրությունները ցույց են տվել, որ այդ կայքերը չեն պարունակում ցեղասպանության վերաբերյալ տեղեկություններ:
«Կոտրել են ոչ թե ցեղասպանության վերաբերյալ կայքեր, այլ տարբեր արտասահմանյան կայքեր եւ տեղադրել ցեղասպանության վերաբերյալ որոշ հայտարարություններ։ Իմ այցելած մոտ 200 կոտրված արտասահմանյան կայքերից ոչ մեկում չեմ գտել ցեղասպանության վերաբերյալ որեւէ տեղեկատվություն»,- ասաց Ս. Մարտիրոսյանը։ Նա նույնիսկ չինարեն որոշ կայքեր է ծրագրով թարգմանել՝ պարզելու դրանց բովանդակությունը, սակայն այնտեղ ցեղասպանության վերաբերյալ նյութեր չի հայտնաբերել: