Nokia ընկերությունը ցուցադրել է Windows Phone 7 պլատֆորմով առաջին սմարթֆոնի նախատիպը, գրում է Electronista միկրոբլոգը: Սարքի մոդելը ներկայացրել է Nokia-ի բջջային ստորաբաժանման ղեկավար Ջո Հարլոուն Mobile World Congress ցուցահանդեսում:

Ներկայումս հայտնի չեն ոչ մոդելների անվանումները, ոչ առանձնահատկություններն ու գինը: Ցուցահանդեսին ներկայացվել է միայն մեկ նախատիպ, որն արված է երկու գույներով: Հարլոուն ասել է, որ նորամուծությունը կարող է վաճառքի հանվել արդեն 2011-ի վերջին, հաղորդում է Lenta.ru-ն:

Nokia-ի եւ Microsoft-ի միջեւ համագործակցության մասին հայտարարվել է ուրբաթ, փետրվարի 11-ին, երկու ընկերությունները առաջիկա երկու տարիներին ստեղծելու են սմարթֆոններ Windows Phone պլատֆորմով: Այդ ընթացքում ընկերությունը հրաժարվելու է Symbian օպերացիոն համակարգերից:

«ԱրմենՏել» ընկերությունը (ապրանքանիշը Beeline) մեկնարկել է Երեւանի 47 ԱՀԿ-ի թվայնացման աշխատանքները:

Ինչպես տեղեկանում է «ԱրմենՏելի» մամուլի ծառայությունից, 47 ԱՀԿ-ի 5000 բաժանորդային գծերի վերամիացումը թվային կայանին նախատեսվում է ավարտել մինչեւ 2011թ. մարտի 31-ը, ապահովելով թվային կապով Երեւանում «ԱրմենՏել» ընկերության ֆիքսված ցանցի բաժանորդների ավելի քան 99 տոկոսին:

Նշենք, որ 47 ԱՀԿ-ի թվայնացման աշխատանքների առաջին փուլի ավարտից հետո ամբողջ երկրում թվային հեռախոսակայաններին միացված կլինի «ԱրմենՏել» ընկերության ֆիքսված ցանցի բաժանորդների 81 տոկոսը:

Samsung ընկերությունը ներկայացրել է Galaxy S II սմարթֆոնը, որը 8,49 մմ հաստություն ունի։ Արտադրողների հավաստիացումներով, դա աշխարհում ամենաբարակ սմարթֆոնն է։

Ինչպես գրում է Engadget տեխնոբլոգը սմարթֆոնի վաճառքը Եվրոպայում եւ հարավ-արեւելյան Ասիայում կսկսվի 2011 թվականի փետրվարին։ Նորույթի գինը դեռեւս չի հաղորդվում։