Փետրվարի 23-ին տեղի ունեցավ www.baku.am կայքէջի շնորհանդեսը: Այն Բաքու քաղաքի հայ համայնքի հասարակական, մշակութային և գործարար կյանքը լուսաբանող իր բնույթով եզակի եռալեզու կայքէջ է, որտեղ զետեղված հարյուրավոր լուսանկարներն ու փոստային բացիկները լուսաբանում են հայկական ընտանիքների, հայապատկան շենքերի, Բաքվում լույս տեսած հայկական մամուլի, գրահրատարակչության, գովազդային հայտարարությունների և, ընդհանրապես Բաքու քաղաքում հայկական երբեմնի մշակութային ներկայության պատմությունը: Առանձին բաժնով ներկայացված է Բաքու քաղաքում 1905, 1918, 1990 թվականներին տեղի ունեցած հայկական կոտորածները լուսաբանող փաստաթղթեր և լուսանկարներ: Այս կայքէջի պատրաստումը յուրահատուկ հարգանքի տուրք է Ադրբեջանի պետական այլատյացությանը և հրահրված ջարդերին զոհ գնացած Բաքվի հայերի հիշատակին: Կայքի պատրաստումը նախաձեռնել և իրականացրել է ՀՀ ԳԱԱ Հայոց ցեղասպանության թանգարան-ինստիտուտը: Վերջինս խուսափել է հայկական տեղեկություններ օգտագործելուց. տեղեկատվությունը հիմնված է արտասահմանյան աղբյուրների վրա: Կայքէջն իր բնույթով այլընտրանքային աղբյուր է` Բաքվի պատմության մասին:
Հատկանշական է, որ արդեն իսկ սպասվում են կայքէջի ուղղությամբ հակաքայլեր և կայքը ջարդելու փորձեր: Ըստ կայքէջի պատասխանատուների, www.baku.am կայքը տեղադրվել է անընդհատ վերահսկվող սերվերի վրա և անգամ ջարդելու դեպքում այն արագ կվերականգնվի: