Microsoft ընկերությունը մի քանի օր առաջ պաշտոնապես հայտարարեց Skype-ի գնման մասին։ Գործարքի արժեքը 8.5 մլրդ դոլար է։
Նշենք, որ Skype-ը վերջին տարիներին լայն օգտագործում է գտել ողջ աշխարհում, իսկ «skyping» բառն արդեն փոխարինում է «զանգահարել ինտերնետի միջոցով» արտահայտությանը։ Skype-ի ծառայությունից օգտվում են միլիոնավոր մարդիկ ամբողջ աշխարհում, այդ թվում՝ Հայաստանում։
Փորձագետների գնահատմամբ՝ նման գործարքի շնորհիվ Microsoft-ը ձեռք կբերի նոր օգտագործողներ, ինչպես նաեւ կամրապնդի դիրքերն ինտերնետում։ Իսկ ամենակարեւոր պատճառը, թե ինչու Microsoft-ը գնեց Skype-ը՝ դա Windows Phone 7-ն է (Mobile OS) եւ Nokia-ն։ Հաշվի առնելով վերջերս Microsoft-ի եւ Nokia-ի միջեւ ձեռքբերված համագործակցությունը, իսկ ներկայումս նաեւ Skype-ի գնումը, պետք է նշել, որ ծրագրային ապահովման ոլորտում հսկա ընկերությունը՝ Microsoft-ը, կարող է նաեւ մեծ դեր խաղալ բջջային հեռախոսների շուկայում։ Բացի այդ, ընկերությունն այս քայլով փորձում է մրցակցային առաջարկ ներկայացնել հեռահաղորդակցության ոլորտում Google Voice-ի եւ Apple-ի առաջիկա նոր ստեղծվող նորույթների ժամանակ։
Skype-ի վաճառքից հետո ինտերնետում պարբերաբար քննարկվում էր այն տեսությունը, որ ծառայությունը կարող է վճարովի դառնալ, իսկ Skype օգտագործողների տվյալները կարող են ավելի հեշտությամբ հայտնվել ազգային անվտանգության աշխատակիցների ձեռքում։
խնդրանքով որոշ պարզաբանումներ տվեց Microsoft ընկերության հայաստանյան գրասենյակի տնօրեն Գրիգոր Բարսեղյանը։ Նրա խոսքով՝ Skype-ի վաճառքից հետո փոխվել են ընդամենը դրա բաժնետերերը։
«Սա ընդամենը բաժնետիրոջ փոփոխություն է եղել։ Skype-ը շարունակելու է աշխատել այնպես, ինչպես աշխատել է։ Ապագա ծրագրերի համաձայն՝ Microsoft ընկերության մի շարք ծառայություններ հասանելի կդառնան նաեւ Skype-ի օգտագործողների համար»,-ասաց Գ. Բարսեղյանը։
Ինչ վերաբերում է նրան, որ վաճառքից հետո Skype-ի օգտագործողների տվյալները կարող են ավելի հեշտությամբ հայտնվել ազգային անվտանգության աշխատակիցների ձեռքում՝ Գ. Բարսեղյանն ասաց. «Microsoft-ն ունի գաղտնիության մասին հայտարարություն (privacy statement), որտեղ ընկերությունը պաշտոնապես պարտավորություն է վերցնում, որ այն տվյալները որոնք կշրջանառվեն այս ծառայությունից օգտվելիս՝ ոչ ոքի չպետք է տրամադրվեն»։
Հիշեցնենք, որ Facebook-ի հիմնադիր Մարկ Ցուկերբերգը նույնպես բանակցություններ էր վարում Skype-ը գնելու շուրջ ու պատրաստ էր Skype-ի դիմաց վճարել 3-4 միլիարդ դոլար: Նման պլաններ ուներ նաեւ Google ընկերությունը:
Նշենք, որ Skype ընկերությունը ստեղծվել է 8 տարի առաջ ու հիմնադրման երկրորդ տարում eBay-ի կողմից գնվել 3 մլրդ դոլարով:
|