Ինֆորմացիոն Տեխնոլոգիաների Ձեռնարկությունների Միությունը (ԻՏՁՄ) եւ Վրաստանի ՏՀՏ ասոցիացիան (ICT Business Council) առաջին անգամ համատեղ կազմակերպում են տեղեկատվական տեխնոլոգիաների հայ-վրացական բիզնես ֆորում։ Այն տեղի կունենա ապրիլի 26-ին Թբիլիսիում` Վրաստանի Էկոնոմիկայի եւ կայուն զարգացման նախարարությունում: Այս մասին տեղեկացնում են Ինֆորմացիոն տեխնոլոգիաների ձեռնարկությունների միությունից։
Ֆորումի օրակարգում կքննարկվեն հետեւյալ հարցերը` շահավետ համագործակցության հաստատում հայ-վրացական ընկերությունների միջեւ, հայկական եւ վրացական ընկերությունների տարածաշրջանային մրցունակության խնդիրներ, ՏՀՏ ոլորտի զարգացման նախաձեռնություններ, համատեղ բիզնես ֆորումների անցկացում։ Կքննարկվեն նաեւ հայկական եւ վրացական ընկերություններում երիտասարդ մասնագետների պրակտիկայի անցկացման առաջարկները:
Նախատեսվում է, որ հայկական պատվիրակությունը բազկացած կլինի մոտ 30 հոգուց։ Մասնակցելու համար արդեն հայտեր են ներկայացրել Armenian Software, CHS Vericel Service, Nork Information-Analytical Center, Norma Plus, Smart-Tech, E-works, Apaga Technologies, IDS Design and Technologies, Vanarmcomp, Westsoft, Essential Solutions, Altacode, SouthTech Consulting, Inc, EKENG, GITC, Compass, Firm Alpha ընկերությունները:
|