Վերջին օրերին ինտերնետ-միջավայրում անընդմեջ խոսվում է Google-ի նոր ծառայության` Google Voice-ի մասին, և մինչ ինտերնետ-օգտագործողները տարբեր ֆորումներում և սոցիալական կայքերում ողջունում են Google-ի այս քայլը, լրատվամիջոցները, անկախ վերլուծաբանները և ուղղակի հետաքրքրված անձիք փորձում են գնահատել Google-ի և Skype-ի միջև ձևավորվող մրցակության խորությունը և կանխատեսում զարգացումներ` տարբեր սցենարներով:

Google-ի նոր ծառայությունը, որը հնարավորություն է տալիս օգտագործողներին Gmail էլ. փոստի միջոցով զանգահարել ոչ միայն համակարգչից համակարգիչ, այլև բջջային և ֆիքսված հեռախոսահամարներին, լուրջ քայլ է ինտերնետային հեռախոսի շուկայում, և ըստ կանխատեսումների` վտանգում է Skype-ի ապագան: Ըստ Google-ի տարածած հայտարարության` մինչև տարեվերջ զանգերը դեպի ամերիկյան ու կանադական հեռախոսահամարներ կլինեն անվճար, իսկ ծառայության նկատմամբ առավել մեծ պահանջարկ ապահովելու նպատակով Google-ը մտադիր է նաև համալսարաններում և օդանավակայաններում տեղադրել հեռախոսախցիկներ` Google Voice-ի ծառայությամբ:

Ինչ վերաբերում է Skype-ին, ապա ներկայումս այն ունի ինտերնետային հեռախոսի շուկայում ամենամեծ մասնաբաժինը և, կարելի է ասել, գտնվում է մոնոպոլ դիրքում: Այսօր այս ծառայությունն ունի ավելի քան 560 մլն գրանցված օգտագործող, սակայն, ըստ անկախ գնահատականների, Skype-ում գրանցվածներից միայն 8 մլն-ն է օգտվում վճարովի զանգերի ծառայությունից: Եվ եթե հաշվի առնենք, որ Google-ը խոստանում է առավել ցածր սակագներ զանգերի դիմաց, ապա Skype-ի դիրքն, իրոք, վտանգված է:

Այս ամենի հետ մեկտեղ, որոշ լրատվամիջոցներ էլ արդեն ձախողում են կանխատեսել նախատեսվող IPO-ի (արժեթղթերի առաջնային տեղաբաշխում) համար: Նշենք, որ Skype Technologies ընկերությունը հայտարարել է արժեթղթերի առաջնային տեղաբաշխում իրականացնելու իր մտադրության մասին և նախատեսել IPO-ի արդյունքում ապահովել 100 մլն դոլարի եկամուտ: Այսօր Skype-ի ընդհանուր արժեքը գնահատվում է 2,75 մլրդ դոլար:

Skype Technologies SA ընկերությունը հիմնադրվել է 2003 թվականին, Լյուքսեմբուրգում: 2005 թվականին Skype ինտերնետ-հեռախոսային ծառայության սեփականատեր է դարձել ամերիկյան eBay ընկերությունը` գնելով Skype-ը 2,6 մլրդ դոլարով: Նախորդ տարվա նոյեմբերին eBay-ը հայտարարել էր Skype-ի բաժնետոմսերի 70%-ը վաճառելու իր մտադրության մասին: Skype-ի նոր սեփականատեր է դարձել Silver Lake Partners ընկերության, Andreessen Horowitz վենչուրային հիմնադրամի և այլ մասնավոր ներդրողների համատեղ ներդրումային խումբը: Գործարքի ընդհանուր արժեքը կազմել էր 1,9 մլրդ դոլար:

Աղբյուրը www.armtech.am