Այսօր Orange-ը մեկնարկում է իր նոր Ինտերնետ Հիմա 14.4 մոդեմների վաճառքը, որոնք հնարավորություն են ընձեռում կատարել բեռնումներ համացանցից մինչև 14.4Մբ/վ տեսական արագությամբ: Այս նոր մոդեմների մեկնարկով, ինչպես նաև վերազինված ամենաարդիական 3G+ ցանցի շնորհիվ Orange-ն արագության և որակի նոր չափանիշներ է սահմանում հայաստանյան շարժական ինտերնետի շուկայում: Ընկերության հայտարարության համաձայն` վերջին մի քանի ամիսներին Orange-ի 3G+ ցանցում կատարված մեծածավալ հզորացման աշխատանքների շնորհիվ Հայաստանի երեք մեծ քաղաքներում ` Երևանում, Գյումրիում և Վանաձորում տվյալների փոխանցման արագությունը հնարավոր է դարձել հասցնել տեսականորեն մինչ 14.4 Մեգաբիթ/վայրկյանի: Ինտերնետ Հիմա 14.4 նոր մոդեմների շնորհիվ Orange-ն իր գերարագ ինտերնետի բաժանորդներին առաջարկում է արագության միանգամայն նոր փորձառություն և ինտերնետ կապի որակ: Կատարյալ պայմաններում Ինտերնետ Հիմա 14.4 մոդեմի շնորհիվ այսուհետ կարելի է տվյալներ բեռնել 7-9 Մբ/վրկ արագությամբ: Միջինում բաժանորդները կունենան 2-5 Մբ/վրկ արագություն, ինչը հնարավորություն կտա նրանց հաշված վայրկյանների ընթացքում բեռնել երաժշտություն, ֆիլմեր, ծրագրեր, ինչպես նաև ֆիլմեր դիտել ինտերնետում առանց ընդհատումների, նույնիսկ HD որակով:

«Այսօրվա առաջարկով մենք նոր չափանիշ ենք սահմանում հայաստանյան շարժական ինտերնետի ոլորտում: Որպես հեռահաղորդակցության ծառայություններ մատուցող ընկերություն` մեր պարտականությունն ու կոչումն է թվային աշխարհի հնարավորությունները հասանելի դարձնել մեր հաճախորդներին, առաջարկել նրանց լավագույն որակ և նորագույն տեխնոլոգիաները: Մենք երբևէ կանգ չենք առնում մեր ձեռքբերումների վրա, և բարելավելով մեր կողմից ներկայումս առաջարկվող ինտերնետի որակը` շարժվում ենք առաջ` առաջարկելով նոր արագություններ և որակ», ասաց Orange-ի գլխավոր տնօրեն Բրունո Դյութուան:

Նոր 3G մոդեմները կարելի է ձեռք բերել ինչպես մեկ տարվա բաժանորդագրությամբ, այնպես էլ առանց բաժանորդագրության: Մեկ տարով բաժանորդագրվելու դեպքում Ինտերնետ Հիմա 14.4 մոդեմը կարժենա 15,000 դրամ, իսկ մոդեմն առանց մեկ տարվա պայմանագրի գնելու դեպքում` 37,000 դրամ:

«Մեզ համար կարևոր է, որ ցանցի տեխնոլոգիական վերազինման արդյունքները անմիջապես հասանելի դառնան մեր բաժանորդների համար: Այս մոդեմներով մենք հնարավորություն ենք տալիս Երևանի, Գյումրիի և Վանաձորի մեր բաժանորդներին արդեն իսկ օգտվել այդ աներևակայելի արագություններից: Եվ ինչպես միշտ, մենք հավատարիմ ենք մեր` «գերարագ ինտերնետը բոլորի համար է» կարգախոսին, որի շրջանակներում առաջարկվող նոր արագությունը նախատեսված է Orange-ի ինչպես նոր, այնպես էլ հին բաժանորդների համար: Ինտերնետ Հիմա 7.2 մոդեմ ունեցող բաժանորդները կարող են ցանկացած պահի վերադարձնել իրենց հին մոդեմը և ստանալ նոր արագություններ ապահովող մոդեմը` վճարելով վերջինիս համար նախատեսված 15,000 դրամը և երկարացնելով պայմանագրի գործողության ժամկետը», ասաց Orange-ի Մարքեթինգի տնօրեն Արամ Մկրտչյանը:

Նոր մոդեմի մեկնարկին զուգահեռ Orange-ը վերանայել է նաև Ինտերնետ Հիմա 7.2 մոդեմի վաճառքի գինը. այն այսուհետ կարելի է ձեռք բերել առանց մեկ տարվա բաժանորդագրության ընդամենը 24,000 դրամով նախկին 35,000-ի փոխարեն:

Ֆրանս Տելեկոմ Խմբի անդամ Օրանժ Արմենիան Հայաստանում շարժական հեռախոսակապի և ինտերնետի ծառայություններ է մատուցում 2009թ. նոյեմբերի 5-ից: Ընկերությունը Հայաստանում 2009թ. կատարել է 140 մլն եվրոյի ներդրումներ, իսկ մինչև 2010թ. վերջ կիրականացնի ևս 50 մլն դոլարի ներդրում և արդեն ապահովում է բջջային կապի ու լայնաշերտ շարժական ինտերնետի հասանելիությունը Հայաստանի 500 քաղաքներում և գյուղերում։ Orange-ի 3G+ ծածկույթն այսօր ամենաընդարձակն է Հայաստանում և ծածկում է բնակչության ավելի քան 85% տոկոսը:

Orange-ը Հայաստանում հանդես է գալիս որպես նորարար և անմիջական բրենդ, և իր գործունեության կարճ ժամանակահատվածում արդեն երկրում առաջնորդել է մի շարք նորարարություններ, ինչպես HD ձայնի ներդրումը, որով Հայաստանը դարձավ այս տեխնոլոգիային տիրապետող երկրորդ երկիրն աշխարհում, մինչև 14.4 Մբ/վ արագությամբ լայնաշերտ ինտերնետ և այլն, որոնք նպատակ ունեն համաշխարհային տեխնոլոգիական նվաճումները հասանելի դարձնել Հայաստանում բնակչության հնարավորինս մեծ մասին: Orange-ը Հայաստանում նաև խթանեց սմարթֆոնների շուկայի զարգացումը` առաջինը ներկայացնելով iPhone, Android համակարգով HTC սմարթֆոններ, և հատուկ առաջարկների շնորհիվ դրանք հասանելի դարձնելով մեծաթիվ սպառողների: Orange-ը վերջերս ներկայացրեց նաև BlackBerry լուծումը Հայաստանում:

Աղբյուրը www.armtech.am