Այսօր` նոյեմբերի 3-ին, տեղի է ունեցել ՀՀ տնտեսական մրցակցության պաշտպանության պետական հանձնաժողովի նիստ, որի շրջանակներում Հանձնաժողովը որոշել է վարչական վարույթ հարուցել «Օրանժ Արմենիա» ընկերության նկատմամբ: Այսպես, ՀՀ ՏՄՊՊՀ-ն, հաշվի առնելով մամուլում (մասնավորապես www.hetq.am կայք եւ «Հետք» շաբաթաթերթ) հրապարակված և Հանձնաժողով դիմած քաղաքացիների բողոքները, որոշում է ընդունել անբարեխիղճ մրցակցության հնարավոր դրսեւորման վերաբերյալ վարչական վարույթ հարուցել «Օրանժ Արմենիա» ընկերության նկատմամբ: Հանձնաժողովը ընկերությանը պարտավորեցրել է 7-օրյա ժամկետում գրավոր տարբերակով տեղեկատվություններ ներկայացնել ընկերության գործունեության հենց սկզբից` 2009թ. նոյեմբերից մինչև 2010թ. հոկտեմբերը տարածված գովազդային նյութերում բաժանորդներին ուղված առաջարկների վերաբերյալ: Հանձնաժողովը «Օրանժ Արմենիային» նաև պարտավորեցրել է ներկայացնել այն բաժանորդների թիվը, ովքեր մինչև պայմանագրի ժամկետի լրանալը հրաժարվել են ընկերության մատուցած ծառայություններից: