Համաշխարհային Սարդոստայնի (World Wide Web) «նախահայր» Թիմ Բերներս-Լին (Tim Berners-Lee), հրապարակելով իր հերթական հոդվածը Scientific American ամսագրի դեկտեմբերյան համարում, ստիպել է շատերին մի պահ մտածել սոցիալական կայքերի վտանգավորության մասին: Հայտնի գյուտի ոչ շատ հայտնի հեղինակը սոցիալական կայքերը, և, մասնավորապես, Facebook-ն, անվանել է մեծագույն վտանգ` համաշխարհային համացանցի համար: Հոդվածը, որը նախ և առաջ նվիրված է Համաշխարհային համացանցի 20-ամյակին, պարզաբանում է, թե ինչպես 1990 թվականի դեկտեմբեր ամսին Թիմ Բերներս-Լինի համակարգչի վրա գործարկվեց պատմության մեջ առաջին վեբ-կայքը: Հենց այս կապակցությամբ էլ Ինտերնետի ստեղծողը որոշեց զգուշացնել վերջին ժամանակներում ի հայտ եկած այն բոլոր վտանգների մասին, որոնք սպառնում են Համաշխարհային ինտերնետ-ցանցին: Այս վտանգներից ամենամեծն ու գլխավորը, Բերներս-Լիի համոզմամբ, խոշոր սոցիալական կայքերն են` համաձայնություն հայտնելով Google-ի այն մտքի հետ, որ Facebook-ը «ծուղակ է առանց ելքի»:
«Սոցիալական կայքերում տեղեկատվության յուրաքանչյուր առանձին հատված չունի իր URI-ն, ինչը նշանակում է, որ տվյալների փոխկապակցվածություն գոյություն ունի միայն տվյալ կայքի ներսում: Եվ որքան շատ եք օգտագործում կայքի հնարավորություններն, այնքան ավելի խորն եք խրվում ծուղակում»,- նշել է Թիմ Բերներս-Լին` հավելելով, որ սոցիալական կայքերի անձնական էջերը վերածվում են կենտրոնական պլատֆորմի` հանդես գալով որպես կոնտեքստի հիմնասյուն, դրանով իսկ արգելելով ամբողջությամբ կառավարել սոցիալական կայքերի անձնական էջերի ամբողջ տեղեկատվությունը: Թիմ Բերներս-Լին կոչ է արել ինտերնետ-օգտագործողներին ընտրել առավել բաց ծառայություններ, ինչպիսիք են GnuSocial և Diaspora կայքերը: