Եթե Դուք դեռևս օգտագործում ենք Internet Explorer 6.0, ապա Facebook-ը «կօգնի» Ձեզ ծանոթանալ բրաուզերների շուկայում ներկայացված առավել նոր տարբերականերին: Սոցիալական ցանցը «պատերազմ» է հայտարարել IE 6-ին և խոստացել անհասանելի դարձնել օնլայն հաղորդագրությունների (չաթ) պատուհանն այս բրաուզերն օգտագործողների համար: Ինչպես նշվում է սոցիալական կայքի բլոգում` 9-ամյա պատմությամբ այս բրաուզերն արդեն «ծեր» է և չի կարողանում աշխատել Facebook-ի` անընդհատ թարմացվող ֆունկցիաներին համապատասխան: Facebook-ը հայտարարում է, որ Internet Explorer 6.0-ի «սիրահարներին» դեռևս հնարավորություն կտրվի IE 6-ի շրջանակներում օգտվել չաթի ծառայությունից մինչև սեպտեմբերի 15-ը, որից հետո այս բրաուզերի համար ծառայությունը կլինի այլևս անհասանելի: Այս ժամանակահատվածում օգտագործողները կարող են IE 6 բրաուզերը փոխարինել IE 8, Google Chrome կամ Firefox բրաուզերներից որևէ մեկով:
Նշենք, որ Facebook-ն առաջինը չէ, որ հրաժարվում է աջակցել Internet Explorer 6.0-ին: Այս տարի նման քայլի է դիմել նաև Google-ը` հրաժարվելով IE 6-ի համար հասանելի թողնել որոշ Google Apps-ներ և YouTube-ի նոր ֆունկցիաները: Իսկ անցյալ տարվա օգոստոսին ավելի քան 72 ընկերություններ միացել էին «Ոչ IE6-ին» նախաձեռնությանը: Անգամ Microsoft-ը խնդրանք-դիմումով ներկայացավ իր օգտագործողներին` առաջարկելով անցում կատարել առավել նոր բրաուզերների:
Այստեղ, անկասկած, առաջանում է հարց` արդյո՞ք դեռևս կան մարդիկ, ովքեր օգտագործում են IE 6: Պարզվում է, որ` այո, կան: Դրանք փոքր և միջին բիզնեսը ներկայացնող ընկերություններն են, պետական որոշ կառույցներ, կազմակերպություններ, որոնց գրասենյակային համակարգիչներում դեռևս գործում է IE 6 բրաուզերը:
Աղբյուրը www.armtech.am