Ամերիկյան Social Intelligence ընկերությունը գործատուներին առաջարկում է իր նոր ծառայությունը, որը հնարավորություն կտա ընկերությունների HR բաժնի աշխատակիցներին տեղեկություններ ստանալ այն ամենի մասին, ինչով «զբաղվում են» իրենց ընկերությունների աշխատակիցները սոցիալական կայքերում: Social Intelligence-ի կողմից մշակված ծրագրային ապահովման համակարգը ավտոմատ կերպով հավաքագրում և դասակարգում է «թիրախային» աշխատակցի կողմից Facebook-ում, Twitter-ում, Flickr-ում, YouTube-ում, LinkedIn-ում, տարբեր բլոգներում և այլ ինտերնետային աղբյուրներում թողած «հետքերը»: Այս «լրտեսական» ծրագրային ապահովման գլխավոր նպատակն է` բացահայտել աշխատակիցների բնավորության «վատ» կողմերը, մասնավորապես, պարզել, թե արդյո՞ք տվյալ աշխատակիցն օգտագործում է ալկոհոլ, հակվա՞ծ է խախտել օրենքը և նմանատիպ այլ փաստեր: Իր ծառայությունները Social Intelligence ընկերությունը մտադիր է առաջարկել առավելապես աշխատանքի տեղավորման գործակալություններին և խոշոր ընկերությունների կադրային բաժիններին, որոնք շատ հաճախ նոր աշխատակիցներ են փնտրում սոցիալական կայքերի միջոցով: Social Intelligence-ի մասնագետները վստահեցնում են, որ կպահանջվի ընդամենը 48 ժամ յուրաքանչյուր մարդու` ինտերնետում թողած «հետքերով» ամբողջական նկարագիրը կազմելու համար: Նշենք նաև, որ ավտոմատ կերպով հավաքված և դասակարգված տվյալները վերջնական փուլում «ձեռքով» մշակվում են Social Intelligence-ի վերլուծաբանների կողմից, որպեսզի բացառվեն տվյալների «կեղծ» համադրությունները:
Ուշադրության արժանի ևս մեկ փաստ. ընկերության մասնագետները վստահեցնում են, որ ամբողջ ինֆորմացիան հավաքագրվում է միայն բաց աղբյուրներից: Այսօր մարդիկ ինտերնետում հրապարակում են իրենց մասին այնքան տեղեկատվություն, որը լիովին բավարար է նկարագրական կերպար կազմելու համար: Իսկ այժմ ոչ այնքան հաճելի մի փաստ ևս. Social Intelligence-ի լրտեսական աշխատանքը չի ավարտվում «թիրախային օբյեկտի» մասին տեղեկատվության հավաքագրմամբ: Եթե պատվիրատու ընկերությունը ցանկակա, ապա Social Intelligence-ը կշարունակի հետախուզությունը և կհետևի «զոհի» ամենօրյա ինտերնետային «գործունեությանը»` բացահայտելու համար, թե արդյոք պատվիրատու ընկերության նոր աշխատակիցներն ինչ կարծիք ունեն իրենց ղեկավարության մասին և ինչպես են արտահայտվում բլոգներում իրենց նոր գործընկերների մասին:
Ընդհանուր առմամբ, Social Intelligence-ը մատուցում է առաջին հերթին աշխատակիցներին ոչ այնքան հաճելի ծառայություններ, սակայն միևնույն ժամանակ ընկերությունը չի խախտում անձնական տվյալների գաղտնիության պայմանը` հավաքագրելով այն տվյալները, որոնք հրապարակել են ուրիշները: Այս դեպքում, պետք է ուղղակի առավել ուշադիր լինել և չվստահել ինտերնետին բոլոր գաղտնիքները:
Աղբյուրը www.armtech.am