Ընթացիկ տարվա երրորդ եռամսյակի արդյունքներով անհատական համակարգիչների վաճառքի ծավալներն ամբողջ աշխարհում աճել են համեմատաբար փոքր տեմպերով, քան կանխատեսում էին վերլուծաբանները: Վերջիններիս գնահատմամբ` նման դինամիկան նախ և առաջ պայմանավորված է համաշխարհային շուկայում iPad-ների և նմանատիպ այլ մինի-համակարգիչների ներկայացմամբ, որով և պայմանավոված սպառողները գերադասում են գնել տեխնոլոգիական մտքի նոր նվաճումները, և ոչ թե ավանդական անհատական համակարգիչները: IDC վերլուծական գործակալության տվյալների համաձայն` այս տարվա հուլիս-սեպտեմբեր ժամանակահատվածում համաշխարհային շուկայում իրացվել է 89,7 մլն անհատական համակարգիչ: Այս ցուցանիշը նախորդ տարվա համեմատությամբ աճել է շուրջ 11%-ով: Ըստ վերլուծական տվյալների` երրորդ եռամսյակի արդյունքներով անհատական համակարգիչների համաշխարհային շուկայի առաջատարն է Hewlett-Packard ընկերությունը, որը շուկայում իրացնել է 15,8 մլն համակարգիչ: Այսօր HP ընկերության մասնաբաժինը համաշխարհային շուկայում կազմել է 17,7%: Անհատական համակարգիչների համաշխարհային շուկայի երկրորդ և երրորդ տեղերը զբաղեցնում են համապատասխանաբար Acer (11,6 մլն) և Dell (11.1 մլն) ընկերությունները: Վերջիններիս մասնաբաժինը շուկայում կազմում է 13% և 12,5%:
Հաշվետու երեք ամիսներին Lenovo-ի վաճառքի ծավալներն աճել են 32,9%-ով և կազմել 9,2 մլն անհատական համակարգիչ, իսկ Asustek-ինը` 30,5% (4,8 մլն): Toshiba-ի վաճառքի ծավալներն այս նույն ժամանակահատվածում աճել են 14,6%-ով:
Աղբյուրը www.armtech.am