Ընթացիկ տարվա արդյունքներով համաշխարհային շուկայում անհատական համակարգիչների վաճառքի ծավալները կաճեն շուրջ 14,3%-ով: Այսպիսին է Gartner վերլուծական գործակալության փորձագետների սպասումները: Կանխատեսվում է, որ այս տարվա արդյունքներով համաշխարհային շուկայում կվաճառվի 352,4 մլն համակարգիչ: Նշենք, որ դեռևս սեպտեմբերին գործակալությունը կանխատեսել էր անհատական համակարգիչների համաշխարհային վաճառքի տարեկան ծավալների աճի առավել բարձր ցուցանիշ` 17,9%-ի սահմաններում: Ինչ վերաբերում է հաջորդ տարվան, ապա Gartner-ի վերլուծաբանները կանխատեսում են անհատական համակարգիչների վաճառքի ծավալների աճ; Այսպես, 2011 թվականի համար տարեկան կտրվածքով սպասվում է ամբողջ աշխարհում համակարգիչների իրացման ծավալների 15,9% աճ: Ըստ վերլուծաբանների գնահատականների` 2011 թվականին համաշխարհային շուկայում կվաճառվի 409 մլն անհատական համակարգիչ: Հատկանշական է, որ Gartner-ը ակնկալում է անհատական համակարգիչների վաճառքի ծավալների աճ` առավելապես շնորհիվ համակարգիչ-պլանշետների և նոր սերնդի սմարթֆոնների նկատմամբ պահանջարկի շարունակական աճի:

Կանխատեսվում է, որ արդեն 2014 թվականին պլանշետները կզբաղեցնեն անհատական համակարգիչների համաշխարհային շուկայի ավելի քան 10%-ը: Նշենք նաև, որ առաջիկա տարիների համար վերլուծաբանները կանխատեսում են նաև անհատական համակարգիչների շուկայական գների աստիճանական նվազում:

Gartner գործակալության տվյալների համաձայն, ընթացիկ տարվա միայն երրորդ եռամսյակում նախորդ տարվա նույն ժամանակահատվածի համեմատությամբ համաշխարհային շուկայում անհատական համակարգիչների վաճառքի ծավալներն աճել են 7,6%-ով և կազմել 88,3 մլն համակարգիչ: