Ամբողջ աշխարհի բջջային հեռախոսների սեփականատերերի համատեղ ջանքներով յուրաքանչյուր վայրկյան ուղարկվում է 200 հազար sms-հաղորդագրություն: Այսպիսի տվյալներ է հրապարակել Հեռահաղորդակցության միջազգային միությունը (International Telecommunication Union, ITU): Կազմակերպությունն իր ուսումնասիրությունների արդյունքները ներկայացրել է ամփոփ զեկույցի տեսքով: Այսպես, պարզվում է, որ հեռախոսային նամակագրության առավել մեծ սիրահարնել են ամերիկացիները և ֆիլիպինցիները: Ընդհանուր առմամբ, ITU-ի տվյալների համաձայն, այս տարվա ընթացքում ամբողջ աշխարհում ուղարկվել է 6,1 մլրդ sms-հաղորդագրություն: Ըստ հաշվարկների` բջջային օպերատորներն այս նույն ժամանակահատվածի կտրվածքով մեկ վայրկյանում աշխատել են 14 հազար դոլար` մեկ sms-ի արժեքը միջինը 0,07 դոլար դիտարկելու դեպքում:
Հեռահաղորդակցության միջազգային միությունը ներկայացրել է նաև որոշ կանխատեսումներ ամբողջ աշխարհում ինտերնետ-օգտագործողների թվաքանակի աճի վերաբերյալ: Այսպես, վերջին 5 տարիներին աշխարհում ինտերնետ-օգտագործողների թվաքանակն աճել է շուրջ 2 անգամ, և արդեն 2010 թվականի արդյունքներով այս ցուցանիշը կհատի 2 մլրդ սահմանագիծը: Այսպիսով, տարեվերջին ինտերնետի «գաղտնիքներն» իր համար բացահայտած կլինի 2 մլրդ ինտերնետ-օգտագործող: Նշենք նաև, որ միայն այս տարին ինտերնետի միացել են 226 մլն օգտագործողներ, որոնցից 162 մլն-ը` զարգացող երկրներից:

Աղբյուրը` www.armtech.am