Orange Armenia-ն պատրաստվում է Հայաստանում ներկայացնել Windows Phone 7 օպերացիոն համակարգով աշխատող սմարթֆոններ: Այս մասին նշել է Orange Armenia ընկերության ղեկավար Բրունո Դյութուան` պատասխանելով իր բլոգի այցելուներից մեկի հարցին, թե պատրաստվում է արդյո՞ք ընկերությունը Հայաստանում ներկայացնել Windows Phone 7 օպերացիոն համակարգով հեռախոսները: Բրունո Դյութուան նշել է, որ հարցն ավելի քան ճիշտ ժամանակին է, քանի որ վերջերիս` հոկտեմբերի 11-ին Orange-ի մայր ընկերության` Ֆրանս Տելեկոմ Խմբի և Microsoft ընկերության գլխավոր տնօրենները հանդիպել են և հայտարարել երկարաժամկետ համագործակցության, և մասնավորապես, Orange-ի գործունեության երկրներում Windows Phone 7-ի ներմուծման մասին:
Հիշեցնենք, որ հենց այս տարվա հոկտեմբերի 11-ին էլ ԱՄՆ-ում տեղի էր ունեցել հեռախոսային նոր օպերացիոն համակարգի` Windows Phone 7-ի շնորհանդեսը, որի շրջանակներում ներկայացվել են նաև 9 նոր սմարթֆոններ, որոնք աշխատում են Microsoft-ի այս նոր ՕՀ-ով: Արդեն իսկ ձեռքբերված պայմանավորվածությունների համաձայն` Windows Phone 7-ը կվաճառվի աշխարհի 30 երկրներում` 60 բջջային օպերատորների կողմից: Windows Phone 7-ով աշխատող հեռախոսներ են արդեն առաջարկել նաև մի շարք առաջատար արտադրողներ, այդ թվում` Dell, HTС, LG և Samsung ընկերությունները:
Աղբյուրը` www.armtech.am