ՎիվաՍել-ՄՏՍ ընկերությունը պատրաստվում է Հայաստանում գործարկել LTE 4-րդ սերնդի անլար կապի ցանցը: Այդ մասին այսօր` սեպտեմբերի 8-ին, DigiTec Expo 2010 ամենամյա միջազգային տեխնոլոգիական ցուցահանդեսին նվիրված մամլո ասուլիսի շրջանակներում լրագրողներին հայտնել է ՎիվաՍել-ՄՏՍ ընկերության տնօրեն Ռալֆ Յիրիկյանը: Նշենք, որ ՎիվաՍել-ՄՏՍ-ը DigiTec Expo 2010 ցուցահանդեսի պլատինե հովանավորն է:

Ռալֆ Յիրիկյանի տեղեկացմամբ` ընկերությունը մտադիր է գործարկել 4-րդ սերնդի կապ` տեխնիկապես պատրաստ լինելուց հետո: Այժմ նախապատրաստական աշխատանքներն են ընթանում, սակայն վերջնական ներդրման ժամկետներն այս պահին հայտնի չեն: Անդրադառնալով 3G տեխնոլոգիաներին` ՎիվաՍել-ՄՏՍ ընկերության տնօրենը նշել է, որ 3G ցանցն այսօր հասանելի է Հայաստանի 650 բնակավայրերում` ապահովելով երկրի տարածքի 3G ցանցի ծածկույթի 92 տոկոսը:

Նշենք, որ MTC բջջային կապի օպերատորը LTE 4-րդ սերնդի ցանցի գործարկման նպատակով որպես «փորձարկման դաշտ» ընտրել էր Տաշքենդը, և LTE 4-րդ սերնդի ցանցն ԱՊՀ տարածքում առաջին անգամ գործարկվել է Տաշքենդում: MTC ընկերության ոչ պաշտոնական հայտարարության համաձայն` LTE ցանցի թեստային գործարկումներն Ուկրաինայում և Հայաստանում նախատեսվում է անցկացնել մինչև ընթացիկ տարվա վերջ:
LTE-ն հաջորդ սերնդի անլար կապի տեխնոլոգիա է` նախատեսված լայնաշերտ հասանելիության բջջային կապի համար:

Աղբյուրը www.armtech.am