Ծրագրավորողները եղել և այսօր էլ շարունակում են մնալ ինչ-որ առումով խորհրդավոր մասնագիտությամբ մարդիկ, ովքեր, ըստ ընդունված կարծիքների, տարբերվում են «սովորական» մարդկանցից: Ծրագրավորողների մասին այսօր պատմվում են տարբեր կատակներ, պատմություններ ու փաստեր, որոնք իրականությանն այնքան էլ չեն համապատասխանում: Ըստ տարածված կարծիքների` ծրագրավորողներն ինքնամփոփ, միայն համակարգիչների մասին մտածող, ինտերնետում «ապրող» մարդիկ են: Սակայն ինչպես պարզվում է, այս պնդումների զգալի մասն ուղղակի հորինված են և ներկայացվում են որպես գեղեցիկ առասպելներ: Եվ այսպես, անիրական կարծիքներ ծրագրավորողների մասին.

Ծրագրավորողների մասին ամենատարածված, բայց և իրականությանն ամենաշատը չհամապատասխանող կարծիքներից մեկն այն է, որ ծրագրավորողներին անհրաժեշտ է միայն համակարգիչ, և ուրիշ ոչինչ: Նման կարծիք մարդկանց մոտ ձևավորվում է ֆիլմերից, որտեղ, օրինակ, հակերները հենց այսպիսին էլ ներկայացվում են:
Շատերը ծրագրավորողներին պատկերացնում են որպես ինքնամփոփ, այնքան էլ շփվել չսիրող մարդկանց: Նման կարծիքն, իհարկե, ինչ-որ չափով ունի իրական «արմատներ»: Բանն այն է, որ ծրագրավորողներն աշխատանքին նվիրում են իրենց ժամանակի զգալի մասը: Իսկ այն կարծիքը, որ ծրագրավորողներն ապրում են ինտերնետում և գերադասում են սոցիալական կայքերն իրական շփումներից, այսօր ինչ-որ չափով կարելի է համարել ճշմարիտ: Ոմանք այստեղ կհամաձայնեն, որ իրենց հարազատ համակարգչից այնկողմ շատ հաճախ ոչինչ չի գրավում:
Եվս մեկ անիրական կարծիք ծրագարվորողների մասին: Ասում են, որ ծրագրավորողները հետաքրքրությունների նեղ շրջանակ ունեցող մարդիկ են, ինչն անկասկած, ամբողջովին հորինված և իրականության հետ որևէ առնչություն չունեցող ենթադրություն է:
Հավերժական քաոսն ու խառնաշփոթն անպակաս են ծրագրավորողների աշխատանքային միջավայրում: Այս կարծիքն, անխոս, ամբողջությամբ չի համապատասխանում իրականությանը, բայց և եկեք համաձայնենք, որ ծրագրավորողի իդեալական մաքուր աշխատանքային սեղան կարելի է հանդիպել շատ հազվադեպ:
Շատերն այսօր ասում են ծրագրավորող և պատկերացնում թափթփված տեսքով, տղաների համար անսովոր` երկար մազերով, տարօրինակ երիտասարդների: Այս կարծիքի ձևավորման հիմքերը դեռևս անհայտ են: Այստեղ ևս, հավանաբար, զգալի է ֆիլմերի ազդեցությունը:
Լավ կին-ծրագրավորողներ չեն լինում: Այս կարծիքն, իհարկե, շատ հեռու է իրականությունից և, միգուցե, այն հորինել են հենց տղամարդ-ծրագրավորողները: Այսօր կին-ծրագրավորողների թիվն այնքան էլ շատ չէ, սակայն քիչ չեն վերջիններս շարքում բարձր որակավորված մասնագետները:
Մի քանի չհիմնավորված կարծիք ևս. ծրագրավորողները միշտ պատմում են անհասկանալի անեկդոտներ, և որ ամենատարածվածն է` ծրագրավորողները կարող են վերանորոգել համակարգիչը և լուծել համակարգչի հետ կապված ցանկացած խնդիր:

Աղբյուրը www.armtech.am