Skype-ը սահմանել է նոր ռեկորդ: Ինչպես նշվում է այս յուրօրինակ ինտերնետ-ծառայության պաշտոնական բլոգում` նոյեմբերի 22-ին Skype-ի ծառայություններից միաժամանակ օգտվել են 25 մլն օգտագործողներ: Նշենք, որ Skype-ի օգտագործողների ընդհանուր թվաքանակն այսօր գերազանցում է 560 մլն-ը, ընդ որում օգտագործողների շրջանում Skype-ի մատուցած ծառայություններից առավել լայն տարածոում ունի ձայնային կապի ծառայությունը: Skype-ը ներկայումս ունի ինտերնետային հեռախոսի շուկայում ամենամեծ մասնաբաժինը և, կարելի է ասել, գտնվում է մոնոպոլ դիրքում, սակայն, ըստ անկախ գնահատականների, Skype-ում գրանցվածներից միայն 8 մլն-ն է օգտվում վճարովի զանգերի ծառայությունից: Հատկանշական է, որ Skype-ի մատուցած ձայնային ծառայությունը առավել մեծ հետաքրքրություն առաջացրեց օգտագործողների շրջանում, երբ ընկերությունը հայտարարեց, որ Skype-ի նոր թարմացված տարբերակը հնարավորություն կտա իրականացնել խմբային վիդեոզանգեր` միաժամանակ 10 օգտագործողների մասնակցությամբ:
Skype Technologies SA ընկերությունը հիմնադրվել է 2003 թվականին, Լյուքսեմբուրգում: 2005 թվականին Skype ինտերնետ-հեռախոսային ծառայության սեփականատեր է դարձել ամերիկյան eBay ընկերությունը` գնելով Skype-ը 2,6 մլրդ դոլարով: Մեկ տարի առաջ eBay-ը հայտարարել էր Skype-ի բաժնետոմսերի 70%-ը վաճառելու իր մտադրության մասին: Skype-ի նոր սեփականատեր էր դարձել Silver Lake Partners ընկերության, Andreessen Horowitz վենչուրային հիմնադրամի և այլ մասնավոր ներդրողների համատեղ ներդրումային խումբը: Գործարքի ընդհանուր արժեքը կազմել էր 1,9 մլրդ դոլար: Արդեն այս տարվա օգոստոսին Skype Technologies ընկերությունը հայտարարել էր արժեթղթերի առաջնային տեղաբաշխում իրականացնելու իր մտադրության մասին:
2010 թվականի առաջին կիսամյակի արդյունքներով նախորդ տարվա համեմատությամբ Skype ընկերությունն ապահովել է զուտ շահույթի 25% աճ: Հաշվետու ժամանակահատվածում ընկերության զուտ շահույթը կազմել է 324 մլն դոլար: