Բրիտանական Խորհուրդն ու ՀՀ Կրթության եւ գիտության նախարարությունը հայտարարում են «Հմտություններն աշխատանքում» բիզնես-առաջադրանք ամենամյա երրորդ մրցույթի մեկնարկը, որն իրականացվում է «ԱրմենՏել» ընկերության (ապրանքանիշը` Beeline) բացառիկ հովանավորությամբ:«Հմտություններն աշխատանքում» բիզնես-առաջադրանք մրցույթը ազգային մրցույթների շարք է, որն անց է կացվում Միացյալ Թագավորությունում եւ Հարավարեւելյան Եվրոպայի (ներառյալ Հայաստանի) 10 երկրում: Մրցույթի նպատակն է խրախուսել երիտասարդներին, մղել նորամուծությունների եւ գործատուների անմիջական ներգրավմամբ զարգացնել նրանց ձեռնարկատիրական հմտությունները: Ավելի քան 3000 ուսանող մասնակցել է 2008/2010 «Հմտություններն աշխատանքում» մրցույթին:
«Հմտություններն աշխատանքում» բիզնես-առաջադրանք մրցույթը մեկնարկում է բիզնես շարադրությունների մրցույթով: Մրցույթի թեման է «Ինչպե՞ս հասնել հաջողության ինտերնետի օգնությամբ»: Մրցույթին կարող են մասնակցել Հայաստանի միջին մասնագիտական հաստատությունների 15-18 տարեկան ուսանողները, ովքեր մինչեւ ս.թ. հոկտեմբերի 29-ը «Ինչպես հասնել հաջողության ինտերնետի օգնությամբ» թեմայով շարադրությունները կներկայացնեն իրենց ուսումնական հաստատությունների տնօրինությանը: Մրցույթին ներկայացրած 50 լավագույն շարադրությունների հեղինակ ուսանողները կհրավիրվեն մասնակցելու ազգային «Հմտություններն աշխատանքում» բիզնես-առաջադրանք մրցույթի ազգային ճամբարին, որը տեղի կունենա նոյեմբերին Ծաղկաձորում: Ազգային մրցույթի հաղթող թիմի անդամները կստանան հատուկ մրցանակներ «ԱրմենՏել»-ից, ինչպես նաեւ կայցելեն «ԱրմենՏել» ընկերություն եւ կստանան այնտեղ պրակտիկա անցնելու բացառիկ հնարավորություն:
«Արդեն երրորդ տարին է, ինչ «ԱրմենՏել» ընկերությունը հովանավորում է բիզնես-առաջադրանքների արդեն ավանդույթ դարձած այս բացառիկ մրցույթը: Սա կորպորատիվ սոցիալական պատասխանատվության հենց այն ձևաչափն է, որ այսօր չափազանց կարևորվում է մեր կողմից: Ստեղծելով երկխոսություն բիզնեսի և կրթության միջև` մենք օգնում ենք հայ երիտասարդներին զարգացնելու իրենց ձեռնարկատիրական հմտությունները, ինչը հետագայում նրանց կդարձնի ավելի մրցունակ` հիմք ծառայելով վառ ապագա կերտելու և նորանոր նվաճումներ ձեռք բերելու գործընթացում», – նշել է «ԱրմենՏել» ընկերության գործադիր տնօրեն Իգոր Կլիմկոն:
