Այսուհետ Orange-ի բաժանորդները կարող են իրենց հեռախոսի կարգավորումներն անվճար ստանալ ոչ միայն հեռախոսի մենյուի միջոցով, այլ ավելի հարմարավետ եղանակով` Orange-ի վեբ կայքի միջոցով: «Օրանժ-Արմենիա» ընկերության հայտարարության համաձայն, կարգավորումները ստանալու համար անհրաժեշտ է այցելել www.orangearmenia.am կայքը և գլխավոր էջից մուտք գործել «առցանց կարգավորումներ» բաժինը: Հեռախոսահամարը և Orange գաղտնաբառը մուտքագրելուց հետո համակարգն ավտոմատ կերպով կճանաչի բաժանորդի հեռախոսի մոդելը և կառաջարկի ընտրել հետևյալ ծառայություններից` MMS, WAP, Orange TV կամ Orange World: Ծառայություններն ընտրելուց հետո բաժանորդն իր հեռախոսին կստանա դրանց կարգավորումները, որից հետո անհրաժեշտ կլինի միայն պահպանել կարգավորումները հեռախոսում: Orange TV ծառայությունն ընտրելու դեպքում Orange World WAP կայքի էջանիշը կհայտնվի բաժանորդի վեբ-բրաուզերի էջանիշերի ցանկում:

Ֆրանս Տելեկոմ Խմբի անդամ Օրանժ Արմենիան Հայաստանում շարժական հեռախոսակապի և ինտերնետի ծառայություններ է մատուցում 2009թ. նոյեմբերի 5-ից: Ընկերությունը Հայաստանում 2009թ. կատարել է 140 մլն եվրոյի ներդրումներ, իսկ մինչև 2010թ. վերջ կիրականացնի ևս 50 մլն դոլարի ներդրում և արդեն ապահովում է բջջային հեռախոսակապի ու լայնաշերտ շարժական ինտերնետի հասանելիությունը Հայաստանի մոտ 600 քաղաքներում և գյուղերում։