| Одноклассники սոցիալական կայքի անընդմեջ տարածմանը զուգընթաց և առավել արագ տեմպերով աճում են կայքի եկամուտները: 2009 ֆինանսական տարում Одноклассники կայքն ապահովել է եկամուտների զգալի աճ: Այսպես, հաշվետու տարում կայքի զուտ շահույթը նախորդ տարվա համեմատությամբ աճել է 9,4 անգամ և կազմել 366,4 մլն ռուբլի: Հասույթն այս նույն ժամանակահատվածում աճել է 2,4 անգամ` կազմելով 1,54 մլրդ ռուբլի: ԱՊՀ տարածքում, այդ թվում և Հայաստանում, լայն տարածում գտած և մեծ պահանջարկ վայելով այս սոցիալական կայքին հաջողվել է ապահովել հիմնական ֆինանսական ցուցանիշների աճ` առավելապես արդյունավետ գովազդային քաղաքականության և գովազդի վաճառքի ծավալների աճի շնորհիվ: Սոցիալական կայքը գովազդի տրամադրման ոլորտում անցում է կատարել փաթեթային վաճառքին սխեմային և իր գովազդատուներին առաջարկում է առավել նախընտրելի պայմաններ: 2010 թվականի միայն ապրիլ ամսվա ընթացքում Одноклассники-ում գովազդի վաճառքի ծավալներն աճել են շուրջ 2,4 անգամ: Նշենք, որ Одноклассники սոցիալական կայքը եկամուտների անընդմեջ աճ է ապահովում վերջին ավելի քան երկու տարիների ընթացքում, ինչը պայմանավորված է այն հանգամանքով, որ 2008 թվականի հոկտեմբերից կայքում գրանցվելը, հետագայում նաև մի շարք այլ ծառայություններ դարձան վճարովի:
|
