Ռուսաստանում iPhone 4 սմարթֆոնները` 16 և 32 գիգաբայթ հիշողությամբ, կարժենան համապատասխանաբար 31,9 հազար և 36,9 հազար ռուբլի: Նշենք, որ մինչ այս բջջային կապի օպերատորները և բջջային հեռախոսների վաճառքով զբաղվող ընկերությունները կանխատեսել էին Ռուսաստանում iPhone 4-ի վաճառքի առավել բարձր գին: Ինչպես արդեն հայտնի է դարձել` iPhone 4 սմարթֆոնները շատ շուտով հնարավոր կլինի պատվիրել Beeline-ի և MTC-ի ինտերնետ-խանութներում, ընդ որում MTC-ի տարածած լրացուցիչ տեղեկատվության համաձայն` iPhone 4 սմարթֆոնների սպիտակ մոդելների վաճառքն ընկերության ինտերնետ-խանութների միջոցով կհետաձգվի մինչև տարեվերջ: Ինչ վերաբերում է «Մեգաֆոն» ընկերությանն, ապա վերջինս դեռևս բանակցություններ է վարում Apple ընկերության հետ:

Նախնական տվյալների համաձայն` սկզբնապես Ռուսաստան է ուղարկվել շուրջ 10 հազար iPhone 4 սմարթֆոնների խմբաքանակ: Ռուսաստանում iPhone 4-ի վաճառքը կմեկնարկի սեպտեմբերի 22-ից:

Հիշեցնենք, որ ամերիկյան Apple ընկերությունը iPhone 4 սմարթֆոնը պաշտոնապես ներկայացրել էր հունիսին, և ընդամենը մի քանի օրվա ընթացքում iPhone 4-ը գրանցել էր վաճառքի ծավալների ռեկորդային աճ: Apple-ի պաշտոնական հայտարարության համաձայն` հունիսի 24-ից մինչեւ 26-ն ընկած ժամանակահատվածում հաջողվել է վաճառել ավելի քան 1,7 մլն iPhone 4: Այսօր iPhone-ը պաշտոնապես վաճառքի է ներկայացված շուրջ 20 երկրներում: Իսկ թե երբ այս հեռախոսների պաշտոնական վաճառքը կմեկնարկի Հայաստանում, դեռևս պարզ չէ, սակայն հուսանք, որ Ռուսաստանի առաջատար բջջային կապի օպերատորները, որոնք գործունեություն են ծավալնում նաև Հայաստանում, iPhone 4-ի հայաստանյան սիրահարներին երկար չեն սպասեցնի:

Աղբյուրը www.armtech.am