2010 թվականի երրորդ եռամսյակի արդյունքներով Հայաստանում էլեկտրոնային առևտրի ծավալները կազմել են ինտերնետային միջավայրում կատարված անկանխիկ վճարումների միայն 20%-ը: Մնացյալ մասը բաժին է ընկել քարտից քարտ փոխանցումներին: Այսպես, ՀՀ կենտրոնական բանկի հրապարակած տվյալների համաձայն, հուլիս-սեպտեմբեր ամիսներին հանրապետությունում վճարային քարտերով իրականացված անկանխիկ գործառնությունների ընդհանուր ծավալում ինտերնետ միջավայրում իրականացված գործառնությունների ծավալը կազմել է 2.6 մլրդ դրամ, այդ թվում` էլեկտրոնային առևտուր` 0.5 մլրդ դրամ, քարտից քարտ փոխանցումներ` 2.1 մլրդ դրամ: Ըստ վիճակագրության, այս երեք ամիսների կտրվածքով ՀՀ-ում, ընդհանուր առմամբ, վճարային քարտերով իրականացվել է 140 մլրդ դրամի գործառնություն: Այդ թվում` քարտերով անկանխիկ վճարումների ծավալը կազմել է մոտ 10.5 մլրդ դրամ: Ցուցանիշը նախորդ տարվա նույն ժամանակահատվածի համեմատ ավելացել է 35%-ով (2.7 մլրդ դրամով):
ՀՀ կենտրոնական բանկի տրամադրած այս վիճակագրական տվյալներն, անշուշտ, այնքան էլ գոհացուցիչ չեն, եթե հաշվի առնենք, որ մեր երկրում էլեկտրոնային առևտրի զարգացման նախադրյալներն աստիճանաբար ձևավորվում են, սակայն, միևնույն ժամանակ, բացակայում են անհրաժշետ խթանները: Որպես էլեկտրոնային առևտրի զարգացմանը խոչընդոտող կարևոր գործոն կարելի է առանձնացնել մեր երկրում վճարային քարտերի տարածվածության խնդիրը, կամ ավելի ճիշտ` էլեկտրոնային գրագիտության ցածր մակարդակը: