Hayland.am առաջին հայկական սոցիալական ցանցը պաշտոնապես հայտարարել է իր կայքում վիդեո-հոսթինգի նոր ծառայության մեկնարկի մասին:Առաջին անգամ Հայաստանում ցանցը իր այցելուներին հնարավորություն է տրամադրել ոչ միայն ներդնել տեսահոլովակներ այլ կայքերից (Youtube և այլն), այլև բեռնել հոլովակներ անմիջապես Hayland.am-ի սերվերին: Ծառայությունը նաև հնարավորություն է տալիս օգտվողներին մեկնաբանել հոլովակները, դասակարգել ըստ տիպերի, ավելացնել ընտրյալների ցուցակին և ներկայացնել լավագույն հոլովակները այլ հանրաճանաչ ռեսուրսներում: Հիշեցնենք, որ վերջերս ամենամեծ հայկական սոցիալական այս ցանցը հայտարարել էր իր «տարածք» 100 հազարերորդ այցելուի մուտքի մասին` այս կերպ դառնալով ինտերնետի գլոբալ ցանցում միակ հայկական ռեսուրսը, որտեղ գրանցված այցելուների թվաքանակն արդեն գերազանցում է 100 հազարը։

Hayland.am սոցիալական կայքը ստեղծվել է 2008 թվականի վերջին։ Հատկանշական է, որ Hayland.am-ը մոնոէթնիկ սոցիալական կայք է, որի այցելուների գերակշիռ մասը մեկ ազգի ներկայացուցիչներ են: Ընդ որում, այս սոցիալական ցանցի այցելուների շուրջ 46%-ը Հայաստանի քաղաքացիներ են:

Որպես հայկական սոցիալական ցանցը՝ Hayland.am-ն անմասն չի մնացել այն ամենից, ինչ համաշխարհային մասշտաբի սոցիալական ցանցերում է կատարվում: Բավական մեծ քանակությամբ քաղաքական, հասարակական գործիչներ, կազմակերպություններ և շոու բիզնեսի ներկայացուցիչներ արդեն գրանցվել են ցանցում։ Նշենք. որ Hayland.am կայքում գրանցվելն անվճար է, սակայն ցանցում առաջարկվող որոշ ծառայություններ այցելուների համար վճարովի են:: Կայքը հասանելի է երեք լեզուներով` հայերեն, ռուսերեն, անգլերեն: Առաջիկայում նախատեսվում է նաև գործարկել կայքի իսպաներեն, արաբերեն, ֆրանսերեն տարբերակները:

Աղբյուրը www.armtech.am