Վերջին ժամանակահատվածում հայ ինտերնետ օգտագործողների շրջանում խորանում է ձևավորված հակասական վերաբերմունքը Հայաստանում լայն տարածում ունեցող Odnoklassniki.ru սոցիալական կայքի նկատմամբ: Եթե որոշ ժամանակ առաջ այս կայք այցելությունը հայ ինտերնետ օգտագործողների օնլայն ժամանակի անբաժան և անփոխարինելի մասն էր կազմում, ապա այսօր այս նույն ինտերնետ օգտագործողների զգալի մասը սպառել է կայքի նկատմամբ իր հետաքրքրությունը` համարելով, որ կայքի «համն ու հոտը» կորել է: Արագորեն աճում է նաև այն ինտերնետ-օգտագործողների թիվը, ովքեր, գտնվելով, որ Odnoklassniki.ru կայքն այլևս չի ծառայում իր նպատակին, նախընտրում են Facebook-ը: Ոմանք էլ, անիմաստ համարելով «վճարովի» Odnoklassniki.ru-ն, փորձում են մոռանալ կայքի գոյության մասին: Սակայն, օգտագործողների` շատ հաճախ ատելության հասնող վերաբերմունքը Odnoklassniki.ru -ի նկատմամբ, պարզվում է, առանձնապես զգալի ազդեցություն չի ունենում այս կայք այցելությունների քանակի կրճաման վրա: Շատ հաճախ հենց Odnoklassniki.ru-ն չսիրողներն, ամեն անգամ քննադատելով այս կայքը, իրենց համակարգիչը միացնելիս առաջին հերթին ստուգում են Odnoklassniki.ru-ի իրենց անձնական էջը: Այս ամենի հետ մեկտեղ, եկեք համաձայնենք, որ կայքն, այնուամենայնիվ, օգտակար նշանակություն ունի բոլոր այն օգտագործողների համար, ովքեր այս կերպ են կարողանում շփվել հեռվում ապրող իրենց բարեկամների, հարազատների ու ընկերների հետ, և այս դեպքում, կայքն ուղղակիորեն կատարում է բարի գործ: Իսկ ինչ վերաբերում է Odnoklassniki.ru-ի միջոցով ինքնահաստատվել ցանկացողներին, ապա վերջիններիս` «լավագույնս» ինքնադրսևորման նպատակով ընտրված այս տարբերակը դեռ երկար ժամանակ կպահպանվի, իսկ մեկից ավել անձնական էջ ունենալ ցանկացողների թվաքանակն էլ, հավանաբար, չի կրճատվի: Շատ չխորանալով Odnoklassniki.ru-ի վերաբերյալ ինտերնետ-միջավայրում անընդմեջ ներկայացվող դեմ և կողմ փաստերի մեջ, նշենք, որ այս կայքի նկատմամբ չեզոք վերաբերմունք ունեցող օգտագործողների ինչ-որ չափով օբյեկտիվ կարծիքի համաձայն` Odnoklassniki.ru-ն դեռևս կունենա երկար կյանք նախ և առաջ շնորհիվ իր պարզության:
Ընդհանուր առմամբ, կարծիքներից և գնահատականներից առավել ճիշտ խոսում են թվերը: Եվ այսպես, «հայկական» Odnoklassniki.ru-ն` թվերով: Այսօր Հայասանից Odnoklassniki.ru-ում գրանցումների ընդհանուր քանակը գերազանցում է 900 հազարը: Ինչպես ArmTech-ին տեղեկացրեց Հայաստանում Odnoklassniki.ru-ի ներկայացուցչության տնօրեն Վահան Աֆանեսյանը` Հայաստանում այս սոցիալական կայքի ակտիվ օգտագործողների (ովքեր այցելում են իրենց անձնական էջ նվազագույնը ամիսը 1 անգամ) ընդհանուր թվաքանակը կազմում է շուրջ 450 հազար: Սակայն ասել, որ odnoklassniki.ru-ն իսկապես այդքան հայաստանցի բնակիչ ունի, ճիշտ չէ: Գաղտնիք չէ, որ շատերը մի քանի անունով են գրանցվում, որպեսզի այցելեն մյուսների էջեր: Չնայած անգամ այս փաստը չի մեղմացնում ցուցանիշի տպավորիչ լինելու հանգամանքը: Անգամ եթե ոչ ամբողջովին հիմնավորված ենթադրությամբ համարենք, որ Հայաստանում odnoklassniki.ru-ում գրանցված յուրաքանչյուր երրորդ ակտիվ օգտագործողն ունի երկու անձնական էջ, իսկ յուրաքանչյուր երկրորդն իր անձնական էջն ամսական ստուգում է միայն 1 անգամ, ապա ցուցանիշն այս դեպքում էլ շաունակում է տպավորիչ մնալ: Այսօր Հայաստանում շատերի համար ինտերնետը սկսվում և ավարտվում է odnoklassniki.ru-ով:
Նշենք նաև, որ 2006 թվականի մարտին ստեղծված այս կայքը ներկայումս ունի ավելի քան 30 մլն գրանցված օգտագործող, որոնց ընդհանուր թվաքանակում Հայաստանի մասնաբաժինը կազմում է 1.2% և այսօր Հայաստանն odnoklassniki.ru-ի երկրների շարքում 8-րդն է:
Odnoklassniki.ru-ի հայաստանյան ներկայացուցչությունից ArmTech-ին տրամադրած տվյալների համաձայն` «հայկական» Odnoklassniki-ում տղամարդիկ կազմում են սոցիալական կայքի հայ օգտագործողների գեակշիռ մասը` շուրջ 56%-ը, իսկ կանայք` 44%-ը: Ինչ վերաբերում է «հայկական» Odnoklassniki.ru-ի տարիքային առանձնահատկություններին, ապա այս տեսանկյունից մեր հանրապետությունում առավել գերակշռում են 18-24 տարիքային խմբում գտնվող հայ օգտագործողները: Այնուհետև, որպես ակտիվ Odnoklassniki-ցիների խումբ գալիս են մինչև 18 տարեկանները: Այս փաստ, իրոք, մտահոգիչ է, եթե հաշվի առնենք, որ այս տարիքային խմբում առավելապես ընդգրկված են դպրոցականներ:
Սոցիալական կայքերի, և հատկապես Հայաստանում odnoklassniki.ru-ի մասին կարելի է խոսել անընդմեջ, սակայն, այնուամենայնիվ, յուրաքանչյուրն ունի իր անձնական կարծիքն ու ընտրության ազատությունը, համենայն դեպս` սոցիալական կայքերի ընտրության հարցում: Այսպես որ, հուսանք, որ մեզ մոտ էլ կձևավորվի սոցիալական կայքերից օգտվելու մշակույթ, և սոցիալական կայքերը կծառայեն իրենց բուն նպատակին:
Աղբյուրը www.armtech.am