Վերջին ամիսներին բավականին արագ տեմպերով Facebook-ը տարածվում է հայաստանյան ինտերնետ-օգտագործողների շրջանում: Արդեն իսկ կարելի է ասել, որ Facebook-ը դարձել է ճանաչված ու սիրելի նաև Հայաստանում: Հայ ինտերնետ-օգտագործողների զգալի մասն այսօր չի պատկերացնում իր օնլայն ժամանակի կազմակերպումն առանց Facebook-ի իր անձնական էջ այցելության: Որոշ դեպքերում էլ խոսվում է անգամ Facebook-ից «կախվածություն» ունենալու մասին: Հատկանշական է, որ միայն վերջին մեկ ամսվա ընթացքում Facebook-ը գրանցել է հայ ինտերնետ-օգտագործողների մեծ ակտիվություն: Այս մեկ ամսվա ընթացքում Facebook-ին են միացել ավելի քան 10 հազար օգտագործողներ Հայաստանից: Այսօր արդեն Facebook-ի հավատարիմ օգտագործողների համաշխարհային բանակին միացել են 100 880 օգտագործողներ Հայաստանից, ընդ որում Հայաստանն իր Facebook-ցիների ընդհանուր թվաքանակով աշխարհի 213 երկրների շարքում 122-րդ է, իսկ Facebook-ցիների թվաքանակի աճի տեմպերով` 45-րդը: Հայաստանի «առցանց» բնակչության շրջանում Facebook-ի ներթափանցության գործակիցը գնահատվում է 48,45%: «Հայկական» Facebook-ում կանայք կազմում են սոցիալական կայքի հայ օգտագործողների գեակշիռ մասը` 55%-ը, իսկ տղամարդիկ` 45%-ը:
Facebook սոցիալական կայքում հայ Facebook-ցիների ընդհանուր թվաքանակի շարունակական և զգալի աճ գրանցվում է արդեն վեցերորդ ամիսն անընդմեջ:Մայիս ամսվա արդյունքներով 55 հազարը չգերազանցող Facebook-ի հայ օգտագործողների թվաքանակը նոյեմբերին արդեն կրկնապատկվեց: Ընդ որում, ակտիվություն են ցուցաբերել ինչպես հայ կանայք, այնպես էլ տղամարդիկ. Facebook-ում հայ կանանց և տղամարդկանց թվաքանակն աճել է գրեթե համամասնորեն, սակայն այն փաստը, որ հայ կանայք ոչ միայն Facebook-ում, այլև այլ սոցիալական կայքերում ունեն գերիշխող դիրք, ակնհայտ է:
Ինչ վերաբերում է «հայկական» Facebook-ի տարիքային առանձնահատկությանն, ապա այս տեսանկյունից, ինչպես և կանխատեսելի է, մեր հանրապետությունում առավել գերակշռում են 18-24 տարիքային խմբում գտնվող հայ Facebook-ցիները: Վերջիններս կազում են Facebook սոցիալական կայքում գրանցված հայ օգտագործողների 44%-ը:
Այնուհետև, առավել ակտիվ են 25-34 տարիքային խմբում ընդգրկված օգտագործողները (32%) և 35-44 տարիքային խմբում ընդգրկված օգտագործողները (8%): Մյուս տարիքային խմբերը ներկայացնող հայ Facebook-ցիների տեսակարար կշիռը չի գերազանցում 10%-ը: Հետքրքիր ևս մեկ փաստ. Հայաստանում Facebook-ը հետաքրքրում է նաև 65 տարեկանն անց քաղաքացիներին: Վերջիններս կազմում են հայաստանյան Facebook-ցիների 1%-ը:
Նշենք, որ այսօր Facebook-ցիների թվաքանակով առաջատար երկրների առաջին հնգյակում ընդգրկված են ԱՄՆ-ն (143 583 400 օգտագործող), Ինդոնեզիան (30 108 220 օգտագործող), Միացյալ Թագավորությունը (28 413 560 օգտագործող), Թուրքիան (23 313 440 օգտագործող) և Ֆրանսիան (19 755 460 օգտագործող):