Նախորդ 12 ամիսների ընթացքում Google-ում «Armenia» բառով միջինը 823 000 որոնում է եղել։ Սա համաձայնեք, այնքան էլ ոգեւորիչ ցուցանիշ չէ, հատկապես եթե հաշվի առնենք այն փաստը, որ Հայաստանի կառավարությունը մոտ 10 տարի է զբոսաշրջությունը գերակա ոլորտ է հռչակել։ Բնականաբար չենք ցանկանում պնդել, որ Google-ի տրամադրած տվյալները ցույց են տալիս Հայաստանի նկատմամբ զբոսաշրջիկների հետաքրքրվածությունը, բայց մյուս կողմից էլ Google-ն ինտերնետում ամենաօգտագործելի որոնողական համակարգն է, իսկ ինտերնետում որոնման լեզուն հիմանականում անգլերենն է։
Այսպես «travel to Armenia», «travel Armenia» բառակապակցություններով ինտերնետ օգտագործողները 12 ամիսների միջինացված կտրվածքով որոնում են կատարել 2900-ական անգամ, «Armenia tourism», «tourism in Armenia» բառակապակցություններով միջինը 1600-ական անգամ, սակայն «tickets to Armenia» բառակապակցությունով որոնման միջին ցուցանիշը Google-ում կազմել է 590։ Երկիր մոլորակի վրա Հայաստանի տեղով հետաքրքրվել են միջինը 5400 անգամ։
12 ամսում «Where is Armenia» (որտեղ է Հայաստանը) բառակապակցությամբ որոնում են բացառապես Միացյալ Նահանգների բնակիչները։ Կարծես Google-ն էլ հաստատում է այն վարկածը, որ ամերիկացիները առանձնապես չեն փայլում իրենց աշխարհագրական գիտելիքներով։ Երկիր մոլորակի վրա Հայաստանի տեղը ճշտելու ամենամեծ ցանկությունն ունեցել են «կովբոյների» հայրենիք Տեխասում։ Տեխասին հաջորդում է Վիրջինիա նահանգը։ 3-րդ տեղում է Կալիֆորնիան, իսկ Հայաստանով հետաքրքրված նահանգների քառյակը եզրափակում է Նյու-Յորքը։
|