Անդրադառնալով Համաշխարհային տնտեսական ֆորումի հրապարակած ցանցային պատրաստվածության ցուցանիշին, որտեղ Հայաստանը աշխարհում 109-րդն է, Հ. Մուսաելյանն ասաց, որ Հայաստանի իրական տեղը 70-80-րդ մակարդակում է: Սակայն հարցմանը մասնակցող 100 հայ գործարարները, որպես կանոն, բացասական պատասխաններ են տալիս, ինչի հետեւանքով մեր երկրի ցուցանիշները անկում են ապրում:

«Ադրբեջանում, օրինակ, այդ հարցումն օբյեկտիվ չէ, քանի որ ոչ ոք չի համարձակվի քննադատել կառավարությանը, իսկ այստեղ այդպիսի խնդիր չկա»,- ասաց Հ. Մուսայելյանը: Նա նշեց մի շարք ձեռքբերումներ, որոնք հաշվի չեն առնվել ցանցային պատրաստվածության ինդեքսում: Այդպիսիք են` 4G ցանցի գործարկումը Վիվասել-ՄՏՍ-ի կողմից, «Սինոփսիս Արմենիայում» բարդագույն տեխնոլոգիական նախագծումները եւ այլն:

«Սինոփսիս Արմենիայի» տնօրենը քննադատեց հայ գործարարներին նաեւ այն բանի համար, որ չեն ցանկանում օգտվել կառավարության քայլերից, որը էլեկտրոնային կառավարման ոլորտում մի շարք նորամուծություններ է կատարել:

«Տեղեկատվական տեխնոլոգիաների համաշխարհային զեկույցը շատ կարեւոր է, սակայն չի նշանակում, թե պետք է լինենք այնպիսի տեղում, որ ծաղրի առարկա դառնանք»,- եզրափակեց Հ. Մուսայելյանը;