Գլխավոր » 2010 » Դեկտեմբեր » 14 » Այս տարի բջջային ցանցին միանում է արդեն 4-րդ սերնդի բջջային կապը
00:33
Այս տարի բջջային ցանցին միանում է արդեն 4-րդ սերնդի բջջային կապը
Դեկտեմբերի 14-ին Ծաղկաձորում մեկնարկել է Հեռահաղորդակցության միջազգային միության` ԱՊՀ անդամ երկրների համար «Նոր տեխնոլոգիաները եւ նրանց ազդեցությունը կարգավորման վրա» թեմայով եռօրյա սեմինարը:
Ինչպես տեղեկանում է Տրանսպորտի եւ կապի նախարարի մամուլի քարտուղար Սուսաննա Տոնոյանից, նախարարության անունից բացման խոսքով հանդես է եկել փոխնախարար Վալտեր Մարությանը եւ նշել, որ Հայաստանի հեռահաղորդակցության շուկայի ազատականացումը վերջին հինգ տարիների ընթացքում բերել է ոչ միայն կապի ծառայությունների գների նվազեցման, այլ աննախադեպ ազդակ է հանդիսացել նոր տեղնոլոգիական լուծումների ներդրմանը:
Մասնավորապես, 2009թ.-ին բջջային կապի ծառայություններ մատուցող բոլոր երեք օպերատորների կողմից շահագործվել է 3-րդ սերնդի բջջային կապը, որը հնարավորություն է տվել ապահովելու մեկ վայրկյանում մի քանի մ/բիտ մուտքի արագություն եւ այսօր անլար մուտքը լարայինի ռեալ մրցակիցն է: Իսկ այս տարի ցանցին միանում է արդեն 4-րդ սերնդի բջջային կապը, որն ավելի կսրի մրցակցությունը եւ արդյունքում կբարելավվի որակը: Ֆիքսված հեռախոսակապն էլ իր հերթին ցուցաբերում է զարգացման նոր տեմպեր, Fiber To The Home տեխնոլագիաների ներդրումով ներկայումս ապահովում են միանգամից երկրի մի քանի օպերատորներ:
Վ. Մարությանն իր խոսքում ընդգծել է նաեւ, որ սեմինարի թեման շատ արդիական է հատկապես Հայաստանի համար, իսկ բարձրակարգ մասնագետների կողմից ներկայացված նյութերը հիմք կհանդիսանան արդյունավետ որոշումների ընդունման համար, ինչպես երկիր հեռահաղորդակցության ոլորտի քաղաքականության մշակման զարգացման գործում, այնպես էլ նոր, ժամանակակից մոտեցումների մշակման հարցում:
Հեռահաղորդակցության միջազգային միության ԱՊՀ տարածաշրջանային ղեկավար Օրոզբեկ Կայկովը նշել է, որ յուրաքանչյուր երկրում ենթակառուցվածքների զարգացումը կախված է այդ ոլորտի կարգավորումից, այդ թվում` համապատասխան նախարարության եւ անկախ հանձնաժողովի գործառույթների հստակեցումից:
Նշենք, որ ավելի քան տաս երկրների առաջատար մասնագետներ եռօրյա սեմինարի ընթացքում կներկայացնեն իրենց երկրների փորձը եւ ոլորտի զարգացման հեռանկարները, ինչպես նաեւ այն խնդիրները, որոնք անհարժեշտ է լուծել նոր սերնդի ցանցերի ստեղծման եւ դրանց արդյուանվետ օգտագործման համար։
