Կառավարության հայտարարած 100 Մբիթ արագությամբ ազգային ցանցի ստեղծման աշխատանքին «ԱրմենՏելը» պատրաստ է մասնակցել, սակայն մինչեւ այժմ հայտնի չէ, թե արդյոք կառուցման համար մրցույթ հայտարարվելո՞ւ է, ցանցը մասնավո՞ր է լինելու, թե՝ պետական։ Հունվարի 18-ին կայացած ասուլիսում այս մասին հայտնեց «ԱրմենՏել» ընկերության գլխավոր տնօրեն Իգոր Կլիմկոն։
NEWS.am-ի հարցին ի պատասխան, թե մոտավոր հաշվարկներով ինչքա՞ն ներդրում անհրաժեշտ կլինի կատարել, որ նման ցանց կառուցվի Հայաստանում, «ԱրմենՏելի» տնօրենը պատասխանեց, որ 100 Մբիթ թողունակություն եւ արագություն ունեցող ցանցի ստեղծման համար անհրաժեշտ կլինի մոտ 500 մլն դոլարի ներդրում կատարել։ «Հայաստանին մոտ գտնվող որեւէ երկիր չկա, որ հայտարարված արագությամբ գործող ցանց ունենա։ Այդ ցանցի ստեղծումը կապված է հսկայական ծախսերի հետ, իսկ կատարված ներդրումների հետ վերադարձը նման ծրագրերում մինչեւ 10 տարի է տեւում»,- ասաց Հայաստանի ամենախոշոր ինտերնետ կապի օպերատոր ընկերության տնօրենը։
Նրա խոսքով՝ «ԱրմենՏելի» ներքին ցանցը Հայաստանում այժմ էլ ամենամեծն է, եւ նախորդ տարի ընկերությունն ավարտել է Հայաստանի հյուսիսում եւ հարավում ինտերնետային ներքին ցանցի օպտիկամանրաթելային օղակաձեւ կապուղիների կառուցումը՝ ապահովելով հանրապետության բոլոր մարզերն ինտերնետ կապով։
Ըստ Կլիմկոյի՝ ինտերնետի արտաքին կապուղիների թողունակությունը վերջին տարներին ավելացել է 137 անգամ, ներկայումս «ԱրմենՏելի» ինտերնետային բաժանորդները շաբաթական սպառում են 100 տերաբայթ ծավալի ինֆորմացիա։
Այս տարի «ԱրմենՏել»-ը շարունակելու է նաեւ 3G ցանցի կատարելագործումը։ Ընկերության գլխավոր տնօրենի խոսքով՝ ներկայումս «ԱրմենՏելի» 3G ցանցի միջին արագությունը 1 Մբիթ է, ինչը Հայաստանում շարժական ինտերնետի համար բավարար արագություն է, սակայն աշխատանքներ են տարվում այն ավելացնելու համար։
|
