Ամբողջ աշխարհի կտրվածքով «անպետք» և «անցանկալի» կայքերի տեսականիով առաջատար է ռուսական .ru դոմենը: Տեղեկատվական ապահովության ոլորտի IBM X-Force հետազոտական խմբի ուսումնասիրությունների և դիտարկումների համաձայն` ռուսական ինտերնետ-դոմենն (.ru) այսօր առաջատար է իր տիրույթում գրանցված սպամային կայքերով` այս ցուցանիշով առաջ անցնելով այնպիսի դոմենային տիրույթներից, ինչպիսիք են .com, .net, .cn (Չինաստան) և .info տիրույթները: Վերջիններս մինչև վերջին ժամանականերս համարվում էին սպամային կայքերի շրջանում տարածված հիմնական գոտիները: Հատկանշական է, որ .ru դոմենում URL-հասցե ունեցող սպամ-կայքերը «ֆիզիկապես» տեղակայված են առավելապես ԱՄՆ-ում, Հնդկաստանում և Բրազիլիայում, իսկ հոսթինգը գտնվում է Չինաստանում:
Ընդհանուր առմամբ, .ru դոմենում ներկայացված «անպետք» կայքերի և սպամի աշխարհագրական ծագման տեսանկյունից առաջատար է ԱՄՆ-ն (9,7%), որին հաջորդում են Բրազիլիան (8,4%), Հնդկաստանը (8,1%), Ռուսաստանը (5,3%), Վիետնամը (4,6%), Հարավային Կորեան (4,1%), Գերմանիան (3,7%), Մեծ Բրիտանիան (3,3%), Ուկրաինան (3,1%), Ռումինիան (3,0%): Հատկանշական է, որ միայն Չինաստանում գրանցված URL-հասցեների 60%-ը, որոնք պարունակում են սպամ, ունեն .ru բարձր մակարդակի դոմեն: