| Այս տարվա երկրորդ եռամսյակում անհատական համակարգիչների համաշխարհային շուկայում գրանցվել է զգալի աճ: Gartner հետազոտական ընկերության տվյալների համաձայն, ապրիլ-հունիս ամիսներին համաշխարհային շուկայում վաճառվել է 82,867 մլն համակարգիչ: Այս ցուցանիշը նախորդ տարվա համապատասխան ժամանակահատվածի համեմատությամբ աճել է շուրջ 20,7%-ով: Նշենք նաև, որ ընթացիկ տարվա առաջին վեց ամիսների արդյունքներով ամբողջ աշխարհում անհատական համակարգիչների իրացման ծավալներն աճել են 19,3%-ով: Վերլուծաբանների կանխատեսումներով` անհատական համակարգիչների վաճառքի ծավալների աճի երկնիշ ցուցանիշ կգրանցվի նաև երրորդ եռամյակում:
Ուսումնասիրությունների համաձայն` ապրիլ-մայիս ամիսներին վաճառքի ծավալների զգալի աճ ապահովել է անհատական համակարգիչներ արտադրությամբ առաջատար ամերիկյան Hewlett-Packard (HP) ընկերությունը: Հաշվետու ամիսներին ընկերությունը համաշխարհային շուկայում իրացրել է 14,455 մլն համակարգիչ: Այս ցուցանիշը նախորդ տարվա համեմատությամբ աճել է 12,3%-ով: HP ընկերության մասնաբաժինը համակարգիչների համաշխարհային շուկայում կազմում է 17,4%: Անհատական համակարգիչների համաշխարհային շուկայում զգալի մասնաբաժին ունի նաև թայվանական Acer ընկերությունը (13%): Վերջին ամիսներին համաշխարհային շուկայում վաճառքի ծավալների զգալի աճ ապահովել են նաև թայվանական ASUSTeK Computer-ը, հարավկորեական Samsung Electronics-ը, չինական Lenovo Group-ը:
|
